ವಡ್ ನಗರ: ಗುಜರಾತ್ ವಿಧಾನಸಭೆ ಚುನಾವಣೆ ಗಮನದಲ್ಲಿಟ್ಟುಕೊಂಡು ಎರಡು ದಿನ ಗುಜರಾತ್ ಪ್ರವಾಸ ಕೈಗೊಂಡಿರುವ ಪ್ರಧಾನಿ ಮೋದಿ, ಇಂದು ಹುಟ್ಟೂರಾದ ವಡ್ ನಗರಕ್ಕೆ ಭೇಟಿ ನೀಡಿ ಇಂದ್ರಧನುಷ್ ಯೋಜನೆಗೆ ಚಾಲನೆ ನೀಡಿದರು.
ಗುಂಜಾ ಗ್ರಾಮದಲ್ಲಿ ಸುಮಾರು 6 ಕಿ.ಮೀಗಳಷ್ಟು ರೋಡ್ ಶೋ ನಡೆಸಿದ ಮೋದಿ ಬಳಿಕ ತಾವು ಓದಿದ ಬಿ.ಎನ್. ಹೈಸ್ಕೂಲ್ಗೆ ತೆರಳಿ ಬಾಲ್ಯವನ್ನ ನೆನೆದು ಜ್ಞಾನದೇಗುಲದ ಆವರಣವನ್ನ ವಂದಿಸಿದರು. ಹಟ್ಕೇಶ್ವರ ದೇವಸ್ಥಾನಕ್ಕೂ ಭೇಟಿ ನೀಡಿ, ಪೂಜೆ ಸಲ್ಲಿಸಿದರು.
ಈ ವೇಳೆ ಮಾತನಾಡಿದ ಪ್ರಧಾನಿ ಮೋದಿ, ನಾನು ತವರಿಗೆ ಮತ್ತೆ ಬಂದಿರೋದು ವಿಶೇಷ. ನನ್ನ ಬಾಲ್ಯದ ಹಲವು ನೆನಪುಗಳು ವಡ್ ನಗರದಲ್ಲಿದೆ. ನನ್ನ ಇಂದಿನ ಸ್ಥಾನ, ಮಾನಗಳಿಗೆ ಹುಟ್ಟೂರೇ ಕಾರಣ ಎಂದರು. ಗುಜರಾತ್ನಲ್ಲಿ ಹಲವು ಯೋಜನೆಗಳಿಗೆ ಚಾಲನೆ ನೀಡುತ್ತೀರುವುದು ನನ್ನ ಅದೃಷ್ಟ ಎಂದು ಹೇಳಿದರು.
ವಡ್ ನಗರ ಐತಿಹಾಸಿಕ ನಗರವಾಗಿದೆ, ಇದು ಪ್ರವಾಸೋದ್ಯಮ ಕೇಂದ್ರವಾಗಲಿದೆ. ಚೀನಾ ಮೂಲದ ವಿದ್ವಾಂಸ ಹ್ಯೂಯೆನ್ ತ್ಸಾಂಗ್ ಇಲ್ಲಿ ಕವಿತೆ ಬರೆದಿದ್ದಾರೆ ಆದ್ದರಿಂದ ವಡ್ ನಗರಕ್ಕೂ ಚೀನಾಗೂ ಐತಿಹಾಸಿಕ ಸಂಬಂಧವಿದೆ ಎಂದರು.
ಭಾರತದ ಸುಧಾರಣೆಗೆ ನಾನು ಶಪಥ ಮಾಡುತ್ತೇನೆ ಎಂದು ಹೇಳಿದ ಅವರು, ದೇಶದಲ್ಲಿ ಆರೋಗ್ಯ ಸೌಲಭ್ಯ ಕೈಗೆಟುಕುವಂತೆ ಮಾಡಲು ಎನ್ಡಿಎ ಸರ್ಕಾರ ಸಾಕಷ್ಟು ಪ್ರಯತ್ನ ಪಡುತ್ತಿದೆ. ವಾಜಪೇಯಿ ಅವರು ಪ್ರಧಾನಿಯಾಗಿದ್ದಾಗ ಈ ಬಗ್ಗೆ ಕ್ರಮ ಕೈಗೊಂಡಿದ್ದರು. ಬಳಿಕ 10 ವರ್ಷಗಳ ಕಾಲ ಯುಪಿಎ ಸರ್ಕಾರ ಅಭಿವೃದ್ಧಿಯನ್ನ ದ್ವೇಷ ಮಾಡಿತ್ತು. ಆದರೆ, ಈಗ ಮತ್ತೆ ಬಡವರಿಗೆ ಕೈಗೆಟುಕುವಂತೆ ಮಾಡಿದ್ದೇವೆ ಎಂದರು.
ಫೀಲ್ಡ್ ಮಾರ್ಷಲ್ ಕಾರಿಯಪ್ಪರನ್ನ ನೆನದ ಪ್ರಧಾನಿ
ತಮ್ಮ ಭಾಷಣದಲ್ಲಿ ಫೀಲ್ಡ್ ಮಾರ್ಷಲ್ ಕಾರಿಯಪ್ಪರನ್ನ ಪ್ರಧಾನಿ ಮೋದಿ ನೆನೆದರು. ಕರ್ನಾಟಕದ ಕಾರಿಯಪ್ಪರವರಿಗೆ ಲಕ್ಷಾಂತರ ಸೈನಿಕರು ಹಾಗೂ ಹಲವರು ಸಲ್ಯೂಟ್ ಮಾಡ್ತಿದ್ದರು. ಆದರೆ, ಅವರು ತವರಿಗೆ ಹೋದಾಗ ಅಲ್ಲಿನ ಜನ ನೀಡುವ ಗೌರವ ಕಾರಿಯಪ್ಪರಿಗೆ ತೀವ್ರ ಹರ್ಷ ನೀಡುತ್ತಿತ್ತಂತೆ. ಈ ಬಗ್ಗೆ ಫೀಲ್ಡ್ ಮಾರ್ಷಲ್ ಕಾರಿಯಪ್ಪ ಹಲವು ಬಾರಿ ನೆನೆದಿದ್ದಾರೆ. ಅದೇ ರೀತಿ ವಡನಗರದಲ್ಲಿ ಅಧಿಕಾರಿಗಳು ಹಾಗೂ ಪ್ರಮುಖವಾಗಿ ಇಲ್ಲಿನ ಜನರ ಸ್ವಾಗತ ಹಾಗೂ ಗೌರವ ನನಗೆ ಹೆಚ್ಚು ಖುಷಿ ಉಂಟುಮಾಡುತ್ತದೆ ಅಂತ ಪ್ರಧಾನಿ ಮೋದಿ ಹೇಳಿದರು.
