ಸಾಮಾಜಿಕ ತಾಣದ ದೈತ್ಯ ಎನಿಸಿಕೊಂಡಿರುವ ಸಾಮಾಜಿಕ ಜಾಲತಾಣಗಳಾದ ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಸಮಸ್ಯೆಗಳು ಕಾಣಿಸಿಕೊಂಡಿದೆ. ಈ ಹಿನ್ನಲೆಯಲ್ಲಿ ಸಾಮಾಜಿಕ ತಾಣದ ಸೇವೆಯಲ್ಲಿ ಅಡಚಣೆ ಉಂಟಾಗಿದೆ. ಫೇಸ್ಬುಕ್ನ ಹೋಮ್ ಪೇಜ್ ಸರ್ವೀಸ್ ಅನ್ಅವೇಲೆಬಲ್ ಎಂಬ ಸಂದೇಶ ಕಾಣಿಸಿಕೊಂಡಿಲ್ಲದೆ, ಕೆಲವೊತ್ತು ಸ್ಥಗಿತಗೊಂಡಿದೆ. ಇದರಿಂದ ಲಕ್ಷಾಂತರ ಬಳಕೆದಾರರು ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ವಿರುದ್ಧ #FacebookDown ಮತ್ತು #InstagramDown ಎಂಬ ಹ್ಯಾಶ್ ಟ್ಯಾಗ್ ನೀಡಿ ಟ್ವಿಟರ್ನಲ್ಲಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಫೇಸ್ಬುಕ್ನಲ್ಲಿ ಈ ತಿಂಗಳಲ್ಲಿ ಇಂತಹ ಸಮಸ್ಯೆ ಕಾಣಿಸಿಕೊಳ್ಳುತ್ತಿರುವುದು ಇದು ಎರಡನೇ ಬಾರಿ. ಫೇಸ್ಬುಕ್ನಲ್ಲಿ ಈ ಸಮಸ್ಯೆ ಕಾಣಿಸಿಕೊಳ್ಳುವ ಮುಂಚಿತವಾಗಿ ಯುರೋಪ್, ಅಮೆರಿಕ ಸೇರಿದಂತೆ ಅನೇಕ ದೇಶಗಳಲ್ಲಿ ಮೆಸೆಂಜರ್ ಆ್ಯಪ್ ಗಂಟೆಗಳ ಕಾಲ ಸ್ಥಗಿತಗೊಂಡಿತ್ತು. ಮೊದಲಿಗೆ ಇದು ಇಂಟರ್ನೆಟ್ ಸಮಸ್ಯೆ ಎಂದು ಭಾವಿಸಲಾಗಿತ್ತಾದರೂ, ಆಮೇಲೆ ಫೇಸ್ಬುಕ್ನಲ್ಲಿ ಉಂಟಾಗಿರುವ ಎರರ್ ಎಂಬುದು ಗೊತ್ತಾಗಿದೆ.
ಡವುನ್ಡಿಟೆಕ್ಟರ್. ಕಾಮ್ ವರದಿ ಪ್ರಕಾರ ಸಾವಿರಾರು ಮೆಸೆಂಜರ್ ಯೂಸರ್ಸ್ ಲಾಗಿನ್ ಸರ್ವರ್ಗೆ ಕನೆಕ್ಟ್ ಆಗಲು ಮತ್ತು ಸಂದೇಶಗಳನ್ನು ಸ್ವೀಕರಿಸಲು ತೊಂದರೆ ಎದುರಿಸಿದ್ದಾರೆ. ಮಂಗಳವಾರ ಬೆಳಿಗ್ಗೆ ಕೆಲವು ಗಂಟೆಗಳ ಬಳಿಕ ಮೆಸೆಂಜರ್ನ್ನು ರಿಸ್ಟೋರ್ ಮಾಡಿಕೊಳ್ಳುವ ಮೂಲಕ ಸೇವೆಯನ್ನು ಪುನರಾರಂಭಿಸಲಾಯಿತು.
ಒಂದು ಮೂಲದ ಪ್ರಕಾರ ಮೆಸೆಂಜರ್ನಲ್ಲಿ ಕಾಣಿಸಿಕೊಂಡ ಈ ಸಮಸ್ಯೆಗೆ ಫೇಸ್ಬುಕ್ನ ಹೊಸ Delete thread ಆಯ್ಕೆಯಾಗಿದೆ. ಈ ಅಪ್ಲಿಕೇಶನ್ನಲ್ಲಿ ನೀಡಲಾಗಿರುವ ಹೊಸ ಆಯ್ಕೆಯು ಕ್ರ್ಯಾಶ್ ಆಗಿರುವ ಕಾರಣದಿಂದ ಮೆಸೆಂಜರ್ ಸ್ಥಗಿತವಾಗಿದೆ ಎನ್ನಲಾಗಿದೆ. ಈ ಹೊಸ ಫೀಚರ್ ಮೂಲಕ ಫೇಸ್ಬುಕ್ ತನ್ನ ಬಳಕೆದಾರರಿಗೆ ಕಳುಹಿಸಲ್ಪಟ್ಟ ಮೆಸೇಜ್ನ್ನು ಡಿಲೀಟ್ ಮಾಡಿಕೊಳ್ಳುವ ಆಯ್ಕೆಯನ್ನು ಒದಗಿಸಿದೆ.
ಫೇಸ್ಬುಕ್ ಪೇಜ್ಗಳು ತುಂಬ ನಿಧಾನವಾಗಿ ತೆರೆದುಕೊಳ್ಳುತ್ತಿದೆ. ಸಂದೇಶ ಕಳಿಸಲು ಸಾಧ್ಯವಾಗುತ್ತಿಲ್ಲ. ಇನ್ಸ್ಟಾಗ್ರಾಂನಲ್ಲೂ ಇದೇ ಸಮಸ್ಯೆ ಕಾಣಿಸಿಕೊಳ್ಳುತ್ತಿದೆ ಎಂದು ಅನೇಕ ಬಳಕೆದಾರರು ದೂರು ಸಲ್ಲಿಸಿದ್ದಾರೆ. ಅಲ್ಲದೆ ಇತ್ತೀಚೆಗೆ ಫೇಸ್ಬುಕ್ ಹ್ಯಾಕಿಂಗ್ ಸುದ್ದಿಗಳು ಕೇಳಿ ಬರುತ್ತಿದ್ದರಿಂದ ಹೆಚ್ಚಿನ ಬಳಕೆದಾರರು ಹ್ಯಾಕ್ ಆಗಿದೆ ಎಂದು ಭಾವಿಸಿದ್ದಾರೆ. ಆದರೆ ಫೇಸ್ ಬುಕ್ ಮತ್ತು ಇನ್ ಸ್ಟಾಗ್ರಾಂ ಡೌನ್ ಆಗಿದ್ದಕ್ಕೆ ನಿಖರ ಕಾರಣವೇನೆಂದು ತಿಳಿದುಬಂದಿಲ್ಲ. ಈ ಕುರಿತು ಫೇಸ್ಬುಕ್ ಕಂಪನಿ ಯಾವುದೇ ಅಧಿಕೃತ ಹೇಳಿಕೆ ನೀಡದೆ ಅಚ್ಚರಿ ಮೂಡಿಸಿದೆ.
