ದೇಶ ಮುಂದುವರೆದಿದೆ ಆದರೆ, ಅದೊಂದು ಕುಟುಂಬ ಮಾತ್ರ ಅಲ್ಲೆ ಉಳಿದುಬಿಟ್ಟಿದೆ; ನೆಹರೂ ವಂಶಸ್ಥರ ಕಾಲೆಳೆದ ಪ್ರಧಾನಿ – ಕಹಳೆ ನ್ಯೂಸ್
ನವ ದೆಹಲಿ : ಮಾಜಿ ಪ್ರಧಾನಿ ದಿವಂಗತ ಜವಹರ್‌ಲಾಲ್ ನೆಹರು ಅವರ ಹಳೆದ ಚಿತ್ರವೊಂದನ್ನು ಉಲ್ಲೇಖಿಸುವ ಮೂಲಕ ಮತ್ತೆ ಕಾಂಗ್ರೆಸ್ ವಿರುದ್ಧ ಹರಿಹಾಯ್ದಿರುವ ಪ್ರಧಾನಿ ನರೇಂದ್ರ ಮೋದಿ “ಕಳೆದ 6 ದಶಕದಲ್ಲಿ ದೇಶ ಮುಂದುವರೆದಿದೆ ಆದರೆ, ಅದೊಂದು ಕುಟುಂಬ ಮಾತ್ರ ಅಲ್ಲೆ ಉಳಿದುಬಿಟ್ಟಿದೆ” ಎಂದು ಕಾಳೆಲೆದಿದ್ದಾರೆ.
ಇತ್ತೀಚೆಗೆ ಉತ್ತರಪ್ರದೇಶದ ರಾಯ್ ಬರೇಲಿ ಕ್ಷೇತ್ರದಲ್ಲಿ ಪ್ರಚಾರ ನಿರತರಾಗಿದ್ದ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕ ಗಾಂಧಿ ಸ್ಥಳೀಯ ಹಾವಾಡಿಗರ ಜೊತೆಗೆ ಮಾತುಕತೆ ನಡೆಸಿದ್ದರು. ಅಲ್ಲದೆ ಸ್ವತಃ ಹಾವನ್ನು ಪುಟ್ಟಿಯಿಂದ ತೆಗೆದು ಅದರ ಮೈ ಸವರಿದ್ದರು. ಈ ವಿಡಿಯೋ ದೇಶದಾದ್ಯಂತ ದೊಡ್ಡ ಮಟ್ಟದ ಸುದ್ದಿಗೆ ಗ್ರಾಸವಾಗಿತ್ತು.
ಇದು ಸುದ್ದಿಯಾಗುತ್ತಿದ್ದಂತೆ ಬಿಕನೇರ್‌ನಲ್ಲಿ ದಶಕಗಳ ಹಿಂದೆ ಅಂದಿನ ಪ್ರಧಾನಿ ಜವಹರ್‌ಲಾಲ್ ನೆಹರು ಅಮೇರಿಕದ ಮೊದಲ ಮಹಿಳೆ ಜಾಕ್ವೆಲಿನ್ ಕೆನಡಿ ಹಾಗೂ ವಿಜಯ ಪಂಡಿತ್ ಜೊತೆಗೆ ಹಾವಾಡಿಗ ಹಾವಾಡಿಸುತ್ತಿರುವ ದೃಶ್ಯವನ್ನು ನೋಡಿ ಆನಂದಿಸುತ್ತಿರುವ ಪೋಟೋ ಒಂದನ್ನು ಉಲ್ಲೇಖಿಸಿ ನಿನ್ನೆ ಮಾತನಾಡಿರುವ ನರೇಂದ್ರ ಮೋದಿ ಮತ್ತೆ ಗಾಂಧಿ ಕುಟುಂಬವನ್ನು ಟೀಕಿಸಿದ್ದಾರೆ.
“ಜವಹರ್‌ಲಾಲ್ ನೆಹರು ತಮ್ಮ ಕಾಲದಲ್ಲಿ ಮಾಡಿದ ಅದೇ ಕೆಲಸವನ್ನು ಅವರ ನಾಲ್ಕನೇ ತಲೆಮಾರು ಮಾಡುತ್ತಿರುವುದು ದುರದೃಷ್ಟಕರ. ಭಾರತ ಈಗ ಕೇವಲ ಹಾವಾಡಿಗರ ದೇಶವಾಗಿ ಮಾತ್ರ ಉಳಿದಿಲ್ಲ. ಅದರ ಹೊರತಾಗಿಯೂ ತಾಂತ್ರಿಕವಾಗಿ ಸಾಕಷ್ಟು ಅಭಿವೃದ್ಧಿ ಸಾಧಿಸಿದೆ. ಆದರೆ ಈ ವಿಚಾರ ಗಾಂಧಿ ಕುಟುಂಬಕ್ಕೆ ಇನ್ನೂ ಅರ್ಥವಾಗಿಲ್ಲ” ಎಂದು ಹರಿಹಾಯ್ದಿದ್ದಾರೆ.
