ಕನ್ನಡ ಚಿತ್ರರಂಗವನ್ನು ಇಡೀ ಭಾರತೀಯ ಚಿತ್ರರಂಗವೇ ಹಿಂತಿರುಗಿ ನೋಡುವಂತೆ ಮಾಡಿದ್ದ ರಾಕಿಂಗ್ ಸ್ಟಾರ್ ಯಶ್ ನಟನೆಯ ಪ್ರಶಾಂತ್ ನೀಲ್ ನಿರ್ದೇಶನದ ‘ಕೆಜಿಎಫ್’ ಚಿತ್ರದ ಮುಂದಿನ ಭಾಗಕ್ಕಾಗಿ ಯಶ್ ಅಭಿಮಾನಿಗಳು ಹಾಗು ವಿಶ್ವದಾದ್ಯಂತ ಇರುವ ಸಿನಿರಸಿಕರು ಕಾತರದಿಂದ ಕಾಯುತ್ತಿದ್ದಾರೆ.
ಹೀಗಿರುವಾಗ ಚಿತ್ರತಂಡ ಇತ್ತೀಚಿಗೆ ಆಯೋಜಿಸಿದ್ದ ಆಡಿಷನ್‍ಗೆ ಭರ್ಜರಿ ರೆಸ್ಪೋನ್ಸ್ ಸಿಕ್ಕಿದ ಬೆನ್ನಲ್ಲೇ, ಚಿತ್ರೀಕರಣವನ್ನು ಆರಂಭಿಸಲು ಚಿತ್ರತಂಡ ಸಕಲ ಸಿದ್ಧತೆ ಮಾಡಿಕೊಂಡು ಯಶ್ ಆಗಮನಕ್ಕೆ ಕಾಯುತ್ತಿದ್ದಾರೆ. ಚುನಾವಣಾ ಪ್ರಚಾರ ಮುಗಿಸಿ ಚಿತ್ರತಂಡವನ್ನು ಸೇರಲು ಯಶ್ ಕೂಡ ರೆಡಿ ಆಗಿದ್ದಾರೆ. ಇನ್ನು ‘ಕೆಜಿಎಫ್ ಚಾಪ್ಟರ್ 2’ಗಾಗಿ ಮೂಡಬಿದ್ರೆಯಲ್ಲಿ ಕಲಾ ನಿರ್ದೇಶಕ ಶಿವಕುಮಾರ್ ನೇತೃತ್ವದಲ್ಲಿ ಸೆಟ್ ನಿರ್ಮಿಸಲಾಗುತ್ತಿದೆ ಎಂಬ ಸುದ್ದಿಯನ್ನ ಖಾಸಗಿ ಸುದ್ದಿ ವಾಹಿನಿ ಪ್ರಸಾರ ಮಾಡಿತ್ತು.
ಇವೆಲ್ಲದರ ಜೊತೆಗೆ ಅಂತಿಮವಾಗಿ ಉಳಿದ ಕಲಾವಿದರಿಗಾಗಿ ಮಂಗಳೂರಿನಲ್ಲಿ ಆಡಿಷನ್ ಕೂಡ ನಡೆದಿದೆ ಎನ್ನಲಾಗಿದೆ. ಬಲ್ಲ ಮೂಲಗಳ ಪ್ರಕಾರ ಇದೇ ಮೇ 8ರಿಂದ ಮಂಗಳೂರಿನ ಆಸುಪಾಸಿನಲ್ಲಿ ಚಿತ್ರೀಕರಣ ಶುರುವಾಗುವುದಾಗಿ ತಿಳಿದುಬಂದಿದೆ.
ಅಧೀರ ಪಾತ್ರದಲ್ಲಿ ಬಾಲಿವುಡ್‍ನ ಸಂಜಯ್ ದತ್ ನಟಿಸಲಿದ್ದಾರೆ ಎಂಬ ಸುದ್ದಿಯಂತೆ, ಸಂಜು ಬಾಬ ಕೆಜಿಎಫ್ ಸೆಟ್ ಸೇರಿಕೊಳ್ಳಲಿದ್ದಾರ ಎಂದು ಕಾದು ನೋಡಬೇಕಾಗಿದೆ.
