ಮಂಜಿನ ಮಲ್ಲಿಗೆ ಮುತ್ತಿನ ತೆರದಿ ಹೊಳೆಹೊಳೆವುದು ತಾ ನೋಡ |
ಮೊಸರಿನ ಗಡಿಗೆ ಒಡೆಯಿತೊ ಎದರೇ ಬಾನಂಗಳದಿ ತಿಳಿಮೋಡ||
ನಂದನವನದಾ ಗೋಪಗೋಪಿಯರ ನವರಸ ನಾಟಕ ಹೊಂಗಿರಣ|
ಅರುಣೋದಯದಾ ಹೊನ್ನ ಶರಧಿಯೊಳು ಜಗಮಗಿಸಿದೆ ತಾ ಅರುಣ||೧||
ಹಕ್ಕಿಯು ಗೂಡನು ಬಿಟ್ಟಿತು ನೋಡು ಅವಸರದವಸರದಲಿ ಈಗ|
ದಿಕ್ಕನು ತೋಚದೆ ಕಂಗೆಡಲಾರವು ಮುಂದಿನ ಬದುಕಿಗೆ ಅದೆ ರಾಗ ||
ದೂರದ ಊರನು ಸೇರುವ ಪಯಣ ಸಾಗರದಾಚಿನ ನವಯುಗಕೆ|
ಬರೆದಿದೆ ಮುನ್ನುಡಿ ಕಲರವದಲಿ ತಾ ಅರುಣೋದಯದಾ ನವಪದಕೆ||೨||
ಜಾಹೀರಾತು
ಜಾಹೀರಾತು
ಜಾಹೀರಾತು
ರಂಗೋಲಿಯ ಬರೆದರು ಹೆಂಗಳೆಯರುತಾ ಮುಂದಣ ಬಾಗಿಲ ಹೊಸ್ತಿಲಲಿ|
ಶೃಂಗಾರದ ಜೋಗುಳ ಪಾಡುತ ಪಾಡುತ ಮಧ್ಯಮ ಪಂಚಮ ರಾಗದಲಿ||
ಅಂಬಾ ಎಂಬ ಕರುವಿನ ಕೂಗು ಕರೆಯಿತು ಅಮೃತ ಘಳಿಗೆಯಲಿ|
ತಣ್ಣನೆಗಾಳಿ ಬೀಸುತ ಬೀಸುತ ನಿದಿರಾ ದೇವಿಯ ಸಹಮತದಲ್ಲಿ||೩||
ಜಾಹೀರಾತು
ಮುಂಗೋಯು ಸ್ವರವನು ಸೇರಿಸಿ ಕುಣಿಯಿತು ನಸುಕಿನ ವೇಳೆಯಲಿ|
ಕಣ್ಣನು ತೆರೆದರೆ ಉಷೆ ನಗುತಿಹಳು ಸ್ವರ್ಣದ ಬಾಗಿಲ ತೆರೆಯುತಲಿ||
ಲಕ್ಷ್ಮೀದೇವಿಯು ಒಳ ಬರಲೆಂದು ಪತಿನಾರಾಯಣ ಜೊತೆಗೂಡಿ|
ದೇವರ ಮನೆಯಾ ಜ್ಯೋತಿಯ ಬೆಳಗಿಸಿ ಸುಪ್ರಭಾತ ತಾ ಹಾಡಿ||೪||
