ಅಭ್ಯರ್ಥಿಗಳು:
ಕ್ಷೇತ್ರದಿಂದ ನಳಿನ್‌ ಕುಮಾರ್ ಕಟೀಲ್‌- ಬಿಜೆಪಿ, ಮಿಥುನ್‌ ಎಂ.ರೈ- ಕಾಂಗ್ರೆಸ್‌, ಮಹಮ್ಮದ್‌ ಇಲಿಯಾಸ್‌-ಎಸ್‌ಡಿಪಿಐ, ಎಸ್‌.ಸತೀಶ್‌ ಸಾಲ್ಯಾನ್‌- ಬಿಎಸ್‌ಪಿ, ವಿಜಯ ಶ್ರೀನಿವಾಸ ಪಿ.-ಉತ್ತಮ ಪ್ರಜಾಕೀಯ ಪಾರ್ಟಿ, ಸುಪ್ರಿತ್‌ ಕುಮಾರ್ ಪೂಜಾರಿ-ಹಿಂದೂಸ್ಥಾನ ಜನತಾ ಪಾರ್ಟಿ, ಪಕ್ಷೇತರರು- ಅಬ್ದುಲ್‌ ಹಮೀದ್‌, ಅಲೆಗ್ಸಾಂಡರ್‌, ದೀಪಕ್‌ ರಾಜೇಶ್‌ ಕುವೆಲ್ಲೊ, ಮಹಮ್ಮದ್‌ ಖಾಲಿದ್‌, ಮ್ಯಾಕ್ಸಿಂ ಪಿಂಟೊ, ವೆಂಕಟೇಶ್‌ ಬೆಂಡೆ, ಎಚ್‌.ಸುರೇಶ್‌ ಪೂಜಾರಿ ಕಣದಲ್ಲಿದ್ದಾರೆ.
ದಕ್ಷಿಣ ಕನ್ನಡದಲ್ಲಿ ಕಾಂಗ್ರೆಸ್‌- ಬಿಜೆಪಿ ಅಭ್ಯರ್ಥಿಗಳ ಮಧ್ಯೆ ನೇರ ಸ್ಪರ್ಧೆ ನಡೆದಿತ್ತು. ತಮ್ಮ ಅಭ್ಯರ್ಥಿಗಳ ಗೆಲುವಿಗೆ ಎರಡೂ ಪಕ್ಷಗಳಿಂದ ಭಾರಿ ಪ್ರಚಾರ, ಚುನಾವಣಾ ತಂತ್ರಗಾರಿಕೆ, ಸ್ವತಃ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಕರೆಸಿ ಪ್ರಚಾರ ನಡೆಸಲಾಗಿತ್ತು. ಚುನಾವಣೆ ಬಳಿಕ ಒಂದು ತಿಂಗಳಿಂದ ನಡೆದ ಕಾತರಕ್ಕೆ ಪೂರ್ಣ ವಿರಾಮ ಬೀಳುವ ಘಳಿಗೆ ಬಂದು ಬಿಟ್ಟಿದೆ.
23ರಂದು ಬೆಳಗ್ಗೆ ಏಳು ಗಂಟೆಗೆ ಎನ್‌ಐಟಿಕೆಯಲ್ಲಿ ಭದ್ರವಾಗಿರುವ ಮತಯಂತ್ರಗಳ ಸ್ಟ್ರಾಂಗ್‌ ರೂಂಗಳನ್ನು ತೆರೆಯಲಾಗುತ್ತದೆ. ಎಂಟು ಗಂಟೆಗೆ ಜಿಲ್ಲಾಧಿಕಾರಿ ಮತ್ತು ಪಕ್ಷದ ಏಜೆಂಟರು ಹಾಗೂ ಅಧಿಕಾರಿಗಳ ಸಮ್ಮುಖದಲ್ಲಿ ಅಂಚೆ ಮತ ಎಣಿಕೆ ಆರಂಭ ನಡೆಯಲಿದೆ.
ಅಂಚೆ ಮತ ಎಣಿಕೆ ಮುಗಿದ ಬೆನ್ನಿಗೇ ಇವಿಎಂಗಳ ಮತ ಎಣಿಕೆಯು 560 ಮತ ಎಣಿಕೆ ಸಿಬ್ಬಂದಿ ಮೂಲಕ ಆರಂಭಗೊಳ್ಳಲಿದೆ. ಪ್ರತಿ ವಿಧಾನಸಭಾ ಕ್ಷೇತ್ರದ ಮತ ಎಣಿಕೆ ಮುಗಿದ ಬಳಿಕ ತಲಾ ಐದು ವಿವಿಪ್ಯಾಟ್‌ಗಳ ಪರಿಶೀಲನೆ ನಡೆಯಲಿದೆ. ಫಲಿತಾಂಶವನ್ನು ಚುನಾವಣಾ ಆಯೋಗದ ಅಧಿಕೃತ ವೆಬ್‌ಸೈಟ್‌ ‘ಸುವಿಧಾ’ಗೆ ಅಪ್‌ಲೋಡ್‌ ಮಾಡುವ ಜತೆಯಲ್ಲೇ ಜಿಲ್ಲಾಧಿಕಾರಿ ಘೋಷಿಸಲಿದ್ದಾರೆ.
ಮತ ಎಣಿಕೆಯು ಎಂಟು ಹಾಲ್‌ಗಳಲ್ಲಿ 14 ಟೇಬಲ್‌ಗಳಲ್ಲಿ ನಡೆಯಲಿದೆ. ಸಿಸಿಟಿವಿಯೊಂದಿಗೆ ಸ್ಟ್ರಾಂಗ್‌ ರೂಂಗೆ 24/7 ಸಿಎಪಿಎಫ್‌ ಸಿಬ್ಬಂದಿ ಸರ್ಪಗಾವಲು ಇರಲಿದೆ. ಅಧಿಕೃತ ವ್ಯಕ್ತಿಗಳನ್ನು ಹೊರತುಪಡಿಸಿ ಮತ ಎಣಿಕೆ ಕೇಂದ್ರದೊಳಗೆ ಮೊಬೈಲ್‌, ಐಪ್ಯಾಡ್‌, ಲ್ಯಾಪ್‌ಟಾಪ್‌ ಮೊದಲಾದ ಇಲೆಕ್ಟ್ರಾನಿಕ್‌ ಸಾಧನಗಳನ್ನು ಕೊಂಡೊಯ್ಯುವಂತಿಲ್ಲ.
ಮಂಗಳೂರು ವಿಧಾನಸಭಾ ಕ್ಷೇತ್ರ- 15 ಸುತ್ತು, ಬಂಟ್ವಾಳ- 18, ಪುತ್ತೂರು- 16, ಸುಳ್ಯ – 17, ಬೆಳ್ತಂಗಡಿ- 18, ಮೂಡುಬಿದಿರೆ- 16, ಮಂಗಳೂರು ಉತ್ತರ- 18, ಮಂಗಳೂರು ದಕ್ಷಿಣ- 18 ಹೀಗೆ ವಿವಿಧ ಸುತ್ತಗಳಲ್ಲಿ ಮತ ಎಣಿಕೆ ನಡೆಯಲಿದೆ.
ಸುರತ್ಕಲ್‌ ಎನ್‌ಐಟಿಕೆಯಲ್ಲಿ ಮತ ಎಣಿಕೆ ನಡೆಯುವುದರಿಂದ ಎಣಿಕೆ ಕೇಂದ್ರದ ಸುತ್ತ ಯಾವುದೇ ರೀತಿಯ ಗೊಂದಲ, ಕಾನೂನು ಸುವ್ಯವಸ್ಥೆಗೆ ತೊಂದರೆ ಆಗದಂತೆ ಬೆಳಗ್ಗೆ ಏಳು ಗಂಟೆಯಿಂದ ವಾಹನ ಸಂಚಾರದಲ್ಲಿ ಬದಲಾವಣೆ ಮಾಡಲಾಗಿದೆ.
ಭದ್ರತಾ ಕೊಠಡಿ ಆವರಣ ಪ್ರವೇಶಕ್ಕೆ ಮೂರು ಹಂತಗಳ ಬಂದೋಬಸ್ತ್‌ ವ್ಯವಸ್ಥೆ ಮಾಡಲಾಗಿದೆ. ಪಾಸ್‌ ಹೊಂದಿರುವ ಅಧಿಕಾರಿ/ ಸಿಬ್ಬಂದಿ, ಮತ ಎಣಿಕೆ ಏಜೆಂಟ್‌, ಅಭ್ಯರ್ಥಿ, ಮಾಧ್ಯಮ ಸಿಬ್ಬಂದಿಗಳು ಈ ಮೂರು ಹಂತಗಳ ಭದ್ರತಾ ತಪಾಸಣೆಗೆ ಒಳಪಟ್ಟು ಆವರಣ ಪ್ರವೇಶಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಮತ ಎಣಿಕೆ ಕೇಂದ್ರಕ್ಕೆ ಅಧಿಕೃತ ಪ್ರವೇಶ ಮಾಡುವವರು ಮೊಬೈಲ್‌ ಹಾಗೂ ಇತರ ವಸ್ತುಗಳನ್ನು ತಪಾಸಣಾ ಹಂತದಲ್ಲಿ ತೆಗೆದಿರಿಸಲು ಕ್ರಮ ಕೈಗೊಳ್ಳಲಾಗಿದೆ.
ಬೆಳಗ್ಗೆ ಏಳು ಗಂಟೆಗೆ ಸ್ಟ್ರಾಂಗ್‌ ರೂಂಗಳನ್ನು ತೆರೆಯಲಾಗುತ್ತದೆ. ಎಂಟು ಗಂಟೆಗೆ ಅಂಚೆ ಮತ ಎಣಿಕೆ ಆರಂಭ ನಡೆಯಲಿದೆ. ಬಳಿಕ ಇವಿಎಂ ಮತ ಎಣಿಕೆ ನಡೆಯಲಿದೆ. ಒಟ್ಟು 560 ಮತ ಎಣಿಕೆ ಸಿಬ್ಬಂದಿ ಭಾಗವಹಿಸಲಿದ್ದಾರೆ. ಪ್ರತಿ ವಿಧಾನಸಭಾ ಕ್ಷೇತ್ರದ ಮತ ಎಣಿಕೆ ಮುಗಿದ ಬಳಿಕ ತಲಾ ಐದು ವಿವಿಪ್ಯಾಟ್‌ಗಳ ಪರಿಶೀಲನೆ ಮಾಡಲಾಗುವುದು.
ಅಭ್ಯರ್ಥಿಗಳ ಸುರಕ್ಷಾ ಸಿಬ್ಬಂದಿಗಳಿಗೆ ಮತ ಎಣಿಕೆ ಕೇಂದ್ರದೊಳಗೆ ಪ್ರವೇಶವಿಲ್ಲ. ವಿಧಾನಸಭಾ ಕ್ಷೇತ್ರಗಳಲ್ಲಿ ಕನಿಷ್ಠ 15 ಸುತ್ತು, ಗರಿಷ್ಠ 18 ಸುತ್ತಿನ ಮತ ಎಣಿಕೆ ನಡೆಯಲಿದೆ. ಎನ್‌ಐಟಿಕೆ ಎದುರು ಜನ ಸೇರುವಂತಿಲ್ಲ. ಸಾರ್ವಜನಿಕ ವಾಹನಗಳಿಗೆ ನಿಲುಗಡೆ ಇರುವುದಿಲ್ಲ.
13 ಲಕ್ಷ ಮಂದಿ ಮತದಾನ
ದಕ್ಷಿಣ ಕನ್ನಡ ಕ್ಷೇತ್ರದಲ್ಲಿ ಈ ಬಾರಿ ದಕ್ಷಿಣ ಕನ್ನಡ ಲೋಕಸಭೆ ಕ್ಷೇತ್ರದಲ್ಲಿ 8,45,308 ಪುರುಷರು ಮತ್ತು 8,79,050 ಮಂದಿ ಮಹಿಳೆಯರು ಸೇರಿದಂತೆ ಒಟ್ಟು 17,24,460 ಮಂದಿ ಮತದಾರರಿದ್ದು, ಅದರಲ್ಲಿ 13,43,378 ಮತ ಚಲಾಯಿಸುವ ಮೂಲಕ ಶೇ.77.90 ಮತದಾನವಾಗಿತ್ತು.
ಮೆರವಣಿಗೆ ಮಾಡುವಂತಿಲ್ಲ!
ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಬುಧವಾರ ಸಂಜೆಯಿಂದ ನಿಷೇಧಾಜ್ಞೆ ವಿಧಿಸಿದ್ದು, ಮೇ 24ರ ಸಂಜೆ ಆರು ಗಂಟೆ ಇರಲಿದೆ. ಈ ಸಂದರ್ಭದಲ್ಲಿ ಮೆರವಣಿಗೆ, ಸಾರ್ವಜನಿಕ/ ರಾಜಕೀಯ ಸಭೆ ನಡೆಸುವುದನ್ನು ನಿಷೇಧಿಸಲಾಗಿದೆ.
ನಿಷೇಧಾಜ್ಞೆ ಅವಧಿಯಲ್ಲಿ ಶಸ್ತ್ರಾಸ್ತ್ರ, ಸ್ಫೋಟಕ ಒಯ್ಯುವುದು ನಿಷೇಧಿಸಲಾಗಿದೆ. ಸುಡು ಮದ್ದುಗಳ ಬಳಕೆಗೂ ಅವಕಾಶವಿರುವುದಿಲ್ಲ. 22ರಂದು ಸಂಜೆ 5 ಗಂಟೆಯಿಂದ ಮೇ 23ರ ಮಧ್ಯಾರಾತ್ರಿವರಿಗೆ ಚುನಾವಣಾ ಆಯೋಗದ ನಿರ್ದೇಶನದಂತೆ ಮದ್ಯಪಾನ ಕೂಡಾ ನಿಷೇಧಿಸಲಾಗಿದೆ.
ನಿಲ್ಲದ ಸೋಲು- ಗೆಲುವು ಲೆಕ್ಕಾಚಾರ
ಚುನಾವಣೆ ಸಂದರ್ಭದಲ್ಲಿ ನಡೆಯುತ್ತಿದ್ದ ಸೋಲು- ಗೆಲುವಿನ ಲೆಕ್ಕಾಚಾರವು ಕೊನೆಯ ಹಂತದ ವರೆಗೂ ಮುಂದುವರಿದಿದೆ. ಬುಧವಾರ ಕೂಡಾ ಎಲ್ಲೆಡೆ ನಿರ್ದಿಷ್ಟ ಅಭ್ಯರ್ಥಿಗಳ ಗೆಲುವಿನ ಬಗ್ಗೆ ಚರ್ಚೆ ನಡೆಯುತ್ತಿತ್ತು.
ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ನಳಿನ್‌ ಕುಮಾರ್ ಕಟೀಲ್‌ ಮತ್ತು ಕಾಂಗ್ರೆಸ್‌ ಅಭ್ಯರ್ಥಿ ಮಿಥುನ್‌ ಎಂ.ರೈ ಮಧ್ಯೆ ನೇರ ಸ್ಪರ್ಧೆ ಏರ್ಪಟ್ಟಿದೆ. ಮಾಧ್ಯಮಗಳ ಚುನಾವಣೋತ್ತರ ಸಮೀಕ್ಷೆಗಳಿಂದ ಬಿಜೆಪಿ ಗೆಲುವಿನ ನಗು ಬೀರುತ್ತಿದ್ದರೆ, ಕಾಂಗ್ರೆಸ್‌ ಕೂಡ ಕಡಿಮೆ ಅಂತರದಿಂದ ಗೆಲ್ಲುವ ವಿಶ್ವಾಸದಲ್ಲಿದೆ. ಪಕ್ಷದ ಕಾರ್ಯಕರ್ತರು, ಜನಸಮಾನ್ಯರಲ್ಲೂ ಚುನಾವಣೆ ಫಲಿತಾಂಶದ ಬಗ್ಗೆ ಭಾರಿ ಕುತೂಹಲ ಏರ್ಪಟ್ಟಿದೆ. ಲೆಕ್ಕಾಚಾರದ ಜತೆಗೆ ಸವಾಲು, ಕೆಲವೆಡೆ ಬೆಟ್ಟಿಂಗ್‌ ಕೂಡಾ ನಡೆಯುತ್ತಿದೆ. ಈ ಬಾರಿ ಅಧಿಕೃತ ಫಲಿತಾಂಶ ವಿಳಂಬವಾಗಲಿದೆ ಎಂಬ ಬಗ್ಗೆಯೂ ಚರ್ಚೆ ನಡೆಯುತ್ತಿದೆ.
