‘ಚೌಕಿದಾರ’ ಈ ಹೆಸರು ಕೇಳಿದಾಕ್ಷಣ ಥಟ್ಟನೆ ನೆನಪಾಗೋದೇ ಪ್ರಧಾನ ಮಂತ್ರಿ ಮೋದಿ ಅವರು. ಈ ‘ಚೌಕಿದಾರ’ ಇಡೀ ದೇಶ ಮಾತ್ರವಲ್ಲ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಿಕ್ಕಾಪಟ್ಟೆ ಸುದ್ದಿಯಾದ ಪದ. ‘ಚೌಕಿದಾರ’ ಈಗ ಕನ್ನಡ ಚಿತ್ರದ ಶೀರ್ಷಿಕೆಯಾಗಿದೆ. ಇನ್ನು ಇಲ್ಲಿ ಚೌಕಿದಾರನಾಗಿರುವುದು ಗೋಲ್ಡನ್ ಸ್ಟಾರ್ ಗಣೇಶ್. ಈ ಚಿತ್ರವನ್ನು ‘ರಥಾವರ’ ಖ್ಯಾತಿಯ ಚಂದ್ರಶೇಖರ್ ಬಂಡಿಯಪ್ಪ ನಿರ್ದೇಶಿಸುತ್ತಿದ್ದಾರೆ.
ಚಿತ್ರದ ಶೀರ್ಷಿಕೆಯನ್ನು ಮೂರು ತಿಂಗಳ ಹಿಂದೆಯೇ ನೋಂದಣಿ ಮಾಡಿಸಲಾಗಿತ್ತು’ ಎನ್ನುತ್ತಾರೆ ಚಂದ್ರಶೇಖರ ಬಂಡಿಯಪ್ಪ. ವಿಶೇಷವೆಂದರೆ ‘ಚೌಕಿದಾರ್’ನಲ್ಲಿ ಗಣೇಶ್ ಅವರು ಸುಮಾರು 55 ವರ್ಷದ ಹಿರಿಯ ನಾಗರಿಕನ ಪಾತ್ರ ನಿರ್ವಹಿಸುತ್ತಿದ್ದಾರೆ. ಪ್ರಸ್ತುತ ಸಮಾಜದಲ್ಲಿ ನಡೆಯುತ್ತಿರುವ ವಿಷಯಗಳು ಚಿತ್ರದಲ್ಲಿರಲಿವೆ. ರಾಜಕೀಯ ಅಂಶಗಳೂ ಚಿತ್ರದ ಹೈಲೈಟ್ ಆಗಿರಲಿವೆ. ಚಿತ್ರದ ಕಥೆಗೂ ‘ಚೌಕಿದಾರ’ ಶೀರ್ಷಿಕೆಗೂ ಸಂಬಂಧವಿದೆ.
ಇದುವರೆಗೆ ಲವ್ವರ್ ಬಾಯ್ ಆಗಿದ್ದ ಗಣೇಶ್ ಅವರಿಗಿಲ್ಲಿ ಬೇರೆ ರೀತಿಯದ್ದೇ ಪಾತ್ರವಿದೆ. ಎಮೋಷನ್ಸ್ ಅಂಶಗಳಿಗೆ ಒತ್ತು ಕೊಡಲಾಗಿದೆಯಂತೆ. ಶೀರ್ಷಿಕೆಗೆ ತಕ್ಕಂತೆ ಗೋಲ್ಡನ್ ಸ್ಟಾರ್ ಇಲ್ಲಿ ವಾಚ್‍ಮೆನ್ ಪಾತ್ರ ಮಾಡಲಿದ್ದಾರ ಎಂಬ ಅನುಮಾನ ಸಿನಿ ಪಂಡಿತರದ್ದು.
‘ಇಂಡಿಯನ್’ ಸಿನಿಮಾಗೆ ಕಮಲಹಾಸನ್‍ಗೆ ಮೇಕಪ್ ಮಾಡಿದ್ದ ಕಲಾವಿದರು ಇಲ್ಲಿ ಗಣೇಶ್ ಅವರಿಗೆ ಮೇಕಪ್ ಮಾಡಲಿದ್ದಾರೆ. ಪ್ಯಾನ್‍ಫೇರ್ ಎಂಟರ್‍ಟೈನ್‍ಮೆಂಟ್ಸ್ ಸಂಸ್ಥೆ ಈ ಚಿತ್ರ ನಿರ್ಮಿಸುತ್ತಿದೆ. ಧರ್ಮವಿಶ್ ಸಂಗೀತ, ಸಿದ್ದೇಗೌಡ ಛಾಯಾಗ್ರಹಣ ಇರಲಿದೆ. ಗಣೇಶ್ರವರ ‘ಗೀತಾ’ ಮತ್ತು ‘ವೇರ್ ಈಸ್ ಮೈ ಕನ್ನಡಕ’ದ ನಂತರ ‘ಚೌಕಿದಾರ’ನಿಗೆ ಆಗಸ್ಟ್ ನಲ್ಲಿ ಚಿತ್ರೀಕರಣ ಶುರುವಾಗಲಿದೆ ಎಂಬುದು ನಿರ್ದೇಶಕರ ಹೇಳಿಕೆ.
