ಶಾಹಿದ್ ಕಪೂರ್ ನಾಯಕತ್ವದಲ್ಲಿ ಮೂಡಿ ಬಂದು ಇದೀಗ ಬಿಡುಗಡೆಯಾಗಿ ಬಾಕ್ಸ್ ಆಫೀಸ್‍ನಲ್ಲಿ ಧೂಳೆಬ್ಬಿಸುತ್ತಿದೆ, ಬಾಲಿವುಡ್‍ನ ‘ಕಬೀರ್ ಸಿಂಗ್’ ಸಿನಿಮಾ! ಈ ಸಿನಿಮಾ ಶಾಹಿದ್ ಕಪೂರ್ ಅವರಿಗೆ ಹೊಸ ಇಮೇಜ್ ನೀಡಲಿದೆ ಎನ್ನಲಾಗುತ್ತಿದೆ.
ಈ ಮೊದಲು ಸಾಕಷ್ಟು ‘ಸಾಫ್ಟ್’ ಪಾತ್ರಗಳು ಮತ್ತು ‘ಲವರ್ ಬಾಯ್’ ಆಗಿ ಕಾಣಿಸಿಕೊಂಡಿದ್ದ ಶಾಹಿದ್ ಕಪೂರ್ ಅವರಿಗೆ ಈ ‘ಕಬೀರ್ ಸಿಂಗ್’ ಮಾಸ್ ಇಮೇಜ್ ಕೊಟ್ಟಿದೆ ಎನ್ನಬಹುದು. ತೆಲುಗಿನಲ್ಲಿ ‘ಅರ್ಜುನ್ ರೆಡ್ಡಿ’ ಸಿನಿಮಾ ನಿರ್ದೇಶಿಸಿದ್ದ ಸಂದೀಪ್ ವಂಗಾ ಅವರೇ ಬಾಲಿವುಡ್‍ನಲ್ಲಿ ಈ ‘ಕಬೀರ್ ಸಿಂಗ್’ ಸಿನಿಮಾವನ್ನು ಸಹ ನಿರ್ದೇಶಿಸಿದ್ದಾರೆ. ಈ ಚಿತ್ರದಲ್ಲಿ ಶಾಹಿದ್ ಕಪೂರ್ ಗೆ ಜೋಡಿಯಾಗಿ ನಟಿ ಕಿಯಾರಾ ಅಡ್ವಾನಿ ಕಾಣಿಸಿಕೊಂಡಿದ್ದಾರೆ.
ತೆಲುಗಿನಲ್ಲಿ 2017ರಲ್ಲಿ ಬಿಡುಗಡೆಯಾಗಿ ಬ್ಲಾಕ್‍ಬಸ್ಟರ್ ಹಿಟ್ ದಾಖಲಿಸಿ ದೇಶಾದ್ಯಂತ ಸುದ್ದಿಯಾಗಿದ್ದ ‘ಅರ್ಜನ್ ರೆಡ್ಡಿ’ ರೀಮೇಕ್ ಚಿತ್ರವೇ ಈ ಕಬೀರ್ ಸಿಂಗ್. ರಿಲೀಸ್ ಆದ ಮೊದಲ ದಿನವೇ 20 ಕೋಟಿ ರೂ. ಕಲೆಕ್ಷನ್ ಮಾಡಿದ್ದ ‘ಕಬೀರ್ ಸಿಂಗ್’ ಸಿನಿಮಾಗೆ, ಎರಡನೇ ದಿನವೂ ಬಹಳಷ್ಟು ಪ್ರೇಕ್ಷಕರ ಸಾಗರ ಹರಿದು ಬಂದಿದ್ದು, ಸುಮಾರು 22 ಕೋಟಿ ರೂ, ಮೂರನೇ ದಿನ 27 ಕೋಟಿ, ನಾಲ್ಕನೇ 23 ಕೋಟಿ ಕಲೆಕ್ಷನ್ ಆಗಿ ತನ್ನ ನಾಗಾಲೋಟವನ್ನು ಮುಂದುವರೆಸಿದೆ.
ಈ ಮೂಲಕ ‘ಕಬೀರ್ ಸಿಂಗ್’ ಸಿನಿಮಾ ಇದುವರೆಗೂ ಅಂದಾಜು 92 ಕೋಟಿ ರೂ. ಕಲೆಕ್ಷನ್ ಮಾಡಿದಂತಾಗಿದೆ. ವಿಶ್ವದಾದ್ಯಂತ ಬರೋಬ್ಬರಿ 3,123 ಸ್ಕ್ರೀನ್‍ಗಳಲ್ಲಿ ತೆರೆಕಂಡಿರುವ ‘ಕಬೀರ್ ಸಿಂಗ್’ ಮುಂದಿನ ದಿನಗಳಲ್ಲಿ ತನ್ನ ಅಬ್ಬರವನ್ನು ಇನ್ನೂ ಹೆಚ್ಚಾಗಿಸುವ ಲಕ್ಷಣವಿದೆ. ಈ ವಾರಾಂತ್ಯದೊಳಗೆ 100 ಕೋಟಿ ರೂ. ಕಲೆಕ್ಷನ್ ಮಾಡುವುದರಲ್ಲಿ ಅನುಮಾನವೇ ಇಲ್ಲ ಎನ್ನಲಾಗುತ್ತಿದೆ.
