ಬಂಟ್ವಾಳ ನಗರ ಠಾಣಾ ಪೋಲೀಸರ ಕಾರ್ಯಚರಣೆಯಲ್ಲಿ ಅಂತರಾಜ್ಯ ಕಳವು ಆರೋಪಿಯ ಬಂಧನ; ನ್ಯಾಯಲಯಕ್ಕೆ ಹಾಜರು – ಕಹಳೆ ನ್ಯೂಸ್
ಬಂಟ್ವಾಳ: ಬಿಸಿರೋಡಿನ ನಂದಿನಿ ಮಿಲ್ಕ್ ಪಾಯಿಂಟ್ ಕಳ್ಳತನ ಮಾಡಿದ ಆರೋಪಿಯನ್ನು ಬಂಟ್ವಾಳ ಅಪರಾಧ ವಿಭಾಗದ ಪೋಲೀಸರು ಬಂಧಿಸಿದ್ದಾರೆ. ಪುತ್ತೂರು ಸಾಲುಮರ ನಿವಾಸಿ ಯೂಸೂಪ್ ಅವರ ಪುತ್ರ ಕೆ.ಮಹಮ್ಮದ್ ಸಲಾಂ ಬಂಧಿತ ಆರೋಪಿ. ಬಂಧಿತನಿಂದ ಒಂದು ಮೋಟಾರು ಸೈಕಲ್, ನಗದು ಹಣ, ಇತರ ಸೊತ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ವಶಪಡಿಸಿಕೊಂಡ ವಸ್ತುಗಳ ಅಂದಾಜು ಮೌಲ್ಯ 60ಸಾವಿರ ಎಂದು ಪೋಲೀಸರು ತಿಳಿಸಿದ್ದಾರೆ. ಬಿಸಿರೋಡಿನ ಸರ್ವೀಸ್ ರಸ್ತೆಯಲ್ಲಿರುವ ನಂದಿನಿ ಮಿಲ್ಕ್ ಪಾಯಿಂಟ್‍ನಲ್ಲಿ ಅ 5 ರಂದು ಮುಂಜಾನೆ ವೇಳೆ ಕಳವು ನಡೆದಿತ್ತು. ಅಲೋಶಿಯಸ್ ಡಿ.ಸೋಜ ಅವರಿಗೆ ಸೇರಿದ ನಂದಿನಿ ಮಿಲ್ಕ್ ಪಾಯಿಂಟ್ ಶಟರ್ ಮುರಿದು ಒಳಪ್ರವೇಶ ಮಾಡಿದ ಆರೋಪಿ, ಕೌಂಟರ್‍ನಲ್ಲಿದ್ದ ಹನ್ನೊಂದು ಸಾವಿರ ನಗದು ಕಳವು ಮಾಡಿ ಪರಾರಿಯಾಗಿದ್ದ.
ಆರೋಪಿಯನ್ನು ಅ 14 ರಂದು ಸಾಯಂಕಾಲ ಮಾರ್ನಬೈಲು ಎಂಬಲ್ಲಿ ವಶಕ್ಕೆ ಪಡೆದುಕೊಂಡಿದ್ದಾರೆ. ಸೋಮವಾರ ಸಂಜೆ ಬಂಟ್ವಾಳ ನಗರ ಠಾಣಾ ಅಪರಾಧ ವಿಭಾಗದ ಪೋಲೀಸರು ವಾಹನ ತಪಾಸಣೆ ನಡೆಸುತ್ತಿದ್ದ ವೇಳೆ ಬೈಕಿನಲ್ಲಿ ಬರುತ್ತಿದ್ದ ಆರೋಪಿ ಪೋಲಿಸರನ್ನು ನೋಡಿ ತಪ್ಪಿಸಲು ನೋಡಿದಾಗ ಪೋಲೀಸರು ಈತನನ್ನು ವಶಕ್ಕೆಪಡೆದುಕೊಂಡು, ವಿಚಾರಣೆ ನಡೆಸಿದಾಗ ಕಳ್ಳತನದ ಪ್ರಕರಣಗಳು ಬೆಳಕಿಗೆ ಬಂದಿವೆ.
ಈತನ ವಿರುದ್ದ ಪುತ್ತೂರು ನಗರ ಠಾಣೆ, ಗೋವಾ ರಾಜ್ಯದ ಮಡಗಾಂವ್ ಪೋಲೀಸ್ ಠಾಣೆ, ಹಾಗೂ ಇತರ ಪೋಲೀಸ್ ಠಾಣೆಗಳಲ್ಲಿ ಕಳ್ಳತನ ಪ್ರಕರಣಗಳು ದಾಖಲಾಗಿವೆ.
