ಪವರ್‌ ಸ್ಟಾರ್‌ ಪುನೀತ್ ರಾಜ್‌ಕುಮಾರ್‌ ಅವರು ಕೋಸ್ಟಲ್‌ವುಡ್‌ನ ಅತ್ಯಂತ ಬೇಡಿಕೆಯ ನಟ, ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್ಗೆ ಕನ್ನಡ ಸಿನಿಮಾದಲ್ಲಿ ನಟಿಸುವಂತೆ ಆಫರ್ ನೀಡಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ಆದರೆ ಬೋಳಾರ್‌ ಅವರು ಪುನೀತ್ ರಾಜ್‌ಕುಮಾರ್‌ ಜತೆ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಅಂದ ಹಾಗೆ ಈ ಆಫರ್ ನೀಡಿದ್ದು ದುಬೈಯಲ್ಲಿ. ದುಬೈಯಲ್ಲಿ ಪಟ್ಲ ಫೌಂಡೇಶನ್‌ನ ಕಾರ್ಯಕ್ರಮವೊಂದರಲ್ಲಿ ಇಬ್ಬರೂ ವೇದಿಕೆ ಹಂಚಿಕೊಂಡಿದ್ದರು. ಈ ಸಂದರ್ಭ ವಿದೇಶದ ನೆಲದಲ್ಲೂ ಬೋಳಾರ್ಗೆ ಇರುವಂಥ ಅಭಿಮಾನಿಗಳನ್ನು ಕಂಡು ಪುನೀತ್ ಅಚ್ಚರಿಗೊಂಡಿದ್ದಾರೆ.
ಇಷ್ಟೇ ಅಲ್ಲದೆ ಬೋಳಾರ್‌ ಪ್ರತಿಭೆಯ ಅನಾವರಣವೂ ಈ ವೇದಿಕೆಯಲ್ಲಿ ನಡೆಯಿತು. ಇದರನ್ನು ವೀಕ್ಷಿಸಿದ ಪುನೀತ್ ಬಳಿಕ ಬೋಳಾರ್‌ ಜತೆ ರಂಗಭೂಮಿ, ಸಿನಿಮಾದ ಕುರಿತು ಸಾಕಷ್ಟು ಚರ್ಚೆ ನಡೆಸಿದರು. ಈ ಸಂದರ್ಭ, ‘ನೀವು ನನ್ನ ಸಿನಿಮಾದಲ್ಲಿ ನಟಿಸಿ’ ಎಂದು ಪುನೀತ್ ಆಹ್ವಾನ ನೀಡಿದ್ದಾರೆ.
ಇನ್ನೊಂದು ಕಡೆ ಪುನೀತ್ ಹಲವಾರು ಸಿನಿಮಾಗಳಲ್ಲಿ ಬಿಝಿ ಇದ್ದಾರೆ. ಪುನೀತ್ ರಾಜ್‌ಕುಮಾರ್‌ ಬ್ಯಾನರ್‌ನ ಚಿತ್ರಕ್ಕೆ ‘ರಾಮಾ ರಾಮಾರೇ’ ಖ್ಯಾತಿಯ ನಿರ್ದೇಶಕ ಸತ್ಯ ಪ್ರಕಾಶ್‌ ಆ್ಯಕ್ಷನ್‌ ಕಟ್‌ ಹೇಳಲಿದ್ದಾರೆ ಎಂಬ ಸುದ್ದಿ ಇದೀಗ ಖಚಿತವಾಗಿದ್ದು, ಈ ಸಿನಿಮಾದಲ್ಲಿ ಪುನೀತ್ ಕೂಡ ನಟಿಸಲಿದ್ದಾರೆ.
