ಪುತ್ತೂರು: ದಕಜಿಪ ಉಹಿಪ್ರಾ ಶಾಲೆ ಕುರಿಯದಲ್ಲಿ ಸಂತ ಫಿಲೋಮಿನಾ ಕಾಲೇಜಿನ ವತಿಯಿಂದ ಆಯೋಜಿಸಲಾದ ಎನ್ನೆಸ್ಸೆಸ್ ವಾರ್ಷಿಕ ವಿಶೇಷ ಶಿಬಿರದಲ್ಲಿ ಡಿಸೆಂಬರ್ 30 ರಂದು ಜರಗಿದ ಸಾಂಸ್ಕøತಿಕ ಕಾರ್ಯಕ್ರಮದಲ್ಲಿ ಕಾಲೇಜಿನ ಯಕ್ಷ ಕಲಾ ಕೇಂದ್ರದ ವತಿಯಿಂದ ‘ಯಕ್ಷಗಾನ ವೈಭವ’ ಪ್ರಸ್ತುತಗೊಂಡಿತು.
ಹಿಮ್ಮೇಳದಲ್ಲಿ ಭಾಗವತರಾಗಿ ಕಾಲೇಜಿನ ಸಹಾಯಕ ಪ್ರಾಧ್ಯಾಪಕ ಹಾಗೂ ಯಕ್ಷಕಲಾ ಕೇಂದ್ರದ ಸಂಯೋಜಕ ಪ್ರಶಾಂತ್‍ರೈ ತನ್ನ ಅದ್ಭುತ ಕಂಠಸಿರಿಯ ಮೂಲಕ ಕಲಾಪ್ರೇಮಿಗಳ ಮನಸೂರೆಗೊಳಿಸಿದರು.
ಯಕ್ಷಕಲಾ ಕೇಂದ್ರದ ಸಂಪನ್ಮೂಲ ವ್ಯಕ್ತಿ ಡಾ. ಪ್ರಖ್ಯಾತ್ ಶೆಟ್ಟಿ ತನ್ನ ಸುಮಧುರ ಹಾಡುಗಾರಿಕೆಯ ಮೂಲಕ ಕೇಳುಗರನ್ನು ಗಾನಲೋಕಕ್ಕೆ ಕೊಂಡೊಯ್ದರು. ಫಿಲೋಮಿನಾ ಕಾಲೇಜಿನ ಯುವ ಪ್ರತಿಭೆಯೆಂದು ಗುರುತಿಸಲ್ಪಟ್ಟ ಬಿಕಾಮ್ ವಿದ್ಯಾರ್ಥಿ ನಿತೀಶ್ ಕುಮಾರ್ ಎಂಕಣ್ಣಮೂಲೆ ಇವರು ಯಕ್ಷಾಸಕ್ತರನ್ನು ತಮ್ಮ ಹಾಡುಗಳಿಂದ ಮಂತ್ರಮುಗ್ದರನ್ನಾಗಿಸುವಲ್ಲಿ ಸಫಲರಾದರು.
ಮದ್ದಳೆವಾದನದಲ್ಲಿ ಸಂತ ಫಿಲೋಮಿನಾ ಪದವಿ ಪೂರ್ವ ಕಾಲೇಜಿನ ದ್ವಿತೀಯ ವರ್ಷದ ವಿದ್ಯಾರ್ಥಿ ಅನೂಪ್ ಸ್ವರ್ಗ, ಚೆಂಡೆವಾದನದಲ್ಲಿ ಕಾಲೇಜಿನ ಹಿರಿಯ ವಿದ್ಯಾರ್ಥಿ ಮುರಳೀಧರ ಕಲ್ಲೂರಾಯ ಕುಂಜೂರುಪಂಜ ಸಹಕರಿಸಿದರು.
ಶ್ರೀರಾಮ ಪಟ್ಟಾಭಿಷೇಕ, ಜಾಂಬವತಿ ಕಲ್ಯಾಣ, ಶ್ರೀದೇವಿ ಮಹಾತ್ಮೆ, ಕನಕಾಂಗಿ ಕಲ್ಯಾಣ, ಪಂಚವಟಿ, ಸಹಸ್ರ ಕವಚ ಮೋಕ್ಷ, ನಾಗ ತಂಬಿಲ ಮೊದಲಾದ ಪೌರಾಣಿಕ ಪ್ರಸಂಗಗಳ ಆಯ್ದ ಹಾಡುಗಳು ಯಕ್ಷ ಗಾಯನದಲ್ಲಿ ಪ್ರಸ್ತುತಗೊಂಡು ಪ್ರೇಕ್ಷಕರನ್ನು ರಂಜಿಸಿತು.
ಕಾಲೇಜಿನ ಪ್ರಾಚಾರ್ಯ ಪ್ರೊ. ಲಿಯೋ ನೊರೊನ್ಹಾ ಮತ್ತು ಕ್ಯಾಂಪಸ್ ನಿರ್ದೇಶಕ ವಂ. ಡಾ. ಆ್ಯಂಟನಿ ಪ್ರಕಾಶ್ ಮೊಂತೇರೊ ಇವರ ಮಾರ್ಗದರ್ಶನದಲ್ಲಿ ಪ್ರದರ್ಶನಗೊಂಡ ಈ ಯಕ್ಷ ಕಾರ್ಯಕ್ರಮದಲ್ಲಿ ಊರಿನ ಗಣ್ಯರಾದ ಬೂಡಿಯಾರು ರಾಧಾಕೃಷ್ಣ ರೈ, ಜೈರಾಜ್ ಭಂಡಾರಿ, ವೆಂಕಟ್ರಮಣ ನಕ್ಷತ್ರಿತ್ತಾಯ ಮೊದಲಾದ ಹಲವಾರು ಗಣ್ಯರು ಉಪಸ್ಥಿತರಿದ್ದು, ಯುವ ಕಲಾವಿದರಿಗೆ ಸ್ಪೂರ್ತಿಯನ್ನು ನೀಡಿದರು.
ಕಾರ್ಯಕ್ರಮದ ಕೊನೆಯಲ್ಲಿ ಶಿಬಿರಾರ್ಥಿ ಪ್ರಜ್ವಲ್ ತನ್ನ ಕೈಚಳಕದÀ ಮೂಲಕ ರಚಿಸಿದ ಅದ್ಭುತ ಕಲಾ ಕುಂಚವನ್ನು ಯಕ್ಷಕಲಾ ಕೇಂದ್ರಕ್ಕೆ ನೆನಪಿನ ಕಾಣಿಕೆಯಾಗಿ ನೀಡಲಾಯಿತು.
ಎನ್ನೆಸ್ಸೆಸ್ ಶಿಬಿರಾಧಿಕಾರಿಗಳಾದ ದಿನಕರ ಅಂಚನ್ ಸ್ವಾಗತಿಸಿ, ಶಶಿಪ್ರಭಾ ಬಿ ವಂದಿಸಿದರು. ಸಹ ಶಿಬಿರಾಧಿಕಾರಿ ಧನ್ಯ ಪಿ ಟಿ ಸಹಕರಿಸಿದರು.
