ಮುಪ್ಪಿನಲ್ಲಿ ಬಾಲ್ಯದ ನೆನಪುಗಳು ವಿಶೇಷ ಅನುಭೂತಿಯನ್ನು ನೀಡುತ್ತವೆ.ಈಗಾಗಲೇ ಚಿತ್ರ ಬಿಡುಗಡೆಯಾಗಿದ್ದು ಕ್ಲಾಸಿಕ್ ಹಿಟ್ ನೀಡಿದೆ.ಹಿರಿಯರಿಂದ ಕಿರಿಯ ಪ್ರೇಕ್ಷಕರು ಚಿತ್ರ ನೋಡಲು ಥೇಯೆಟರ್‍ಗೆ ಬಂದರೆ ಎಲ್ಲಾ ಜನರೇಷನ್‍ಗೆ ಮ್ಯಾಚ್ ಆಗುವ ಚಿತ್ರ ಇದಾಗಿದೆ.
ಜೀವನದಲ್ಲಿ ಅತಿ ಸುಂದರ ಕ್ಷಣ ಅಂದರೆ ಅದು ಬಾಲ್ಯ. ಮತ್ತೆ ಮತ್ತೆ ನೆನಪಾಗುವ ಘಳಿಗೆ ಅದು. ಇಂಥ ಬಾಲ್ಯದ ನೆನಪುಗಳು ವೃದ್ಧಾಪ್ಯದಲ್ಲಿ ಹೇಗೆ ನಮ್ಮನ್ನು ಕಾಡುತ್ತವೆ ಎನ್ನುವುದನ್ನು ಬೆಳ್ಳಿ ತೆರೆಯ ಮೇಲೆ ಮೂಡಿಸಿ ಯಶಸ್ವಿಯಾಗಿದ್ದಾರೆ ನಿರ್ದೇಶಕ ಕಿಶೋರ್ ಮೂಡಬಿದ್ರೆ. ತುಳುವಿನ ‘ಅಪ್ಪೆ ಟೀಚರ್’ ಚಿತ್ರದ ಮೂಲಕ ನಿರ್ದೇಶನಕ್ಕೆ ಪದಾರ್ಪಣೆ ಮಾಡಿದ ಕಿಶೋರ್, ಬಾಲ್ಯ ಮತ್ತು ವೃದ್ಧಾಪ್ಯದ ನೆನಪುಗಳ ಹೆಣೆಯುವ ಪ್ರಯತ್ನದಲ್ಲಿ ಯಶಸ್ವಿ ಆಗಿದ್ದಾರೆ.
ಕಥೆ ಸುಂದರವಾಗಿದೆ. ಅದನ್ನು ನಿಧಾನವಾಗಿ ತೆಗೆದುಕೊಂಡು ಹೋಗಿ ಸುರಕ್ಷಿತವಾಗಿ ದಡ ಮುಟ್ಟಿಸುವಲ್ಲಿ ನಿರ್ದೇಶಕರು ಸೈ ಎನಿಸಿಕೊಂಡಿದ್ದಾರೆ.ಸಂಭಾಷಣೆ ಸೊಗಸಾಗಿದೆ. ಎಲ್ಲಾ ಪಾತ್ರಗಳನ್ನು ಉತ್ತಮವಾಗಿ ದುಡಿಸಿಕೊಂಡಿದ್ದಾರೆ.
ಬಾಲ್ಯದ ನೆನಪುಗಳನ್ನು ಹುಡುಕುತ್ತ ಹೊರಟ ಸಾಹಿತಿಯೊಬ್ಬನ ಕಥಾನಕವೇ ಚಿತ್ರದ ವಸ್ತು. ಲಕ್ಷ್ಮೀನಾರಾಯಣ ಮಾಲ್ಗುಡಿ (ವಿಜಯ್ ರಾಘವೇಂದ್ರ) ಎಂಬ ಹಿರಿಯ ಸಾಹಿತಿ ಬೆಂಗಳೂರಿನಲ್ಲಿ ವಾಸಿಸುತ್ತಿರುತ್ತಾರೆ. ಪತ್ನಿ ವಿಯೋಗದ ನಂತರ ಏಕಾಂಗಿಯಾದ ಸಾಹಿತಿ, ತನ್ನ ಬಾಲ್ಯದ ನೆನಪುಗಳನ್ನು ಹುಡುಕಿಕೊಂಡು ತಾನು ಆಡಿ ಬೆಳೆದ, ಕಲಿತ ಶಾಲೆ ಮಾಲ್ಗುಡಿಗೆ ಬರುತ್ತಾರೆ. ಮಾಲ್ಗುಡಿಯಲ್ಲಿ ಕಳೆದ ಬಾಲ್ಯದಲ್ಲಿ ನೆನಪುಗಳ ಮೆರವಣಿಗೆಯೇ ಕಥೆ.
ಲಕ್ಷ್ಮೀನಾರಾಯಣ ಪಾತ್ರದ ಚಿನ್ನಾರಿ ಮುತ್ತ (ವಿಜಯ್ ರಾಘವೇಂದ್ರ )ಮುಪ್ಪಿನ ಪಾತ್ರಕ್ಕೆ ಯೌವನ ತುಂಬಿದ್ದಾರೆ. ವಿಜಯ್ ರಾಘವೇಂದ್ರ ಅವರ ಮನೋಜ್ಞ ಅಭಿನಯ ಪ್ರೇಕ್ಷಕರನ್ನು ಹಿಡಿದಿಟ್ಟು ಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಬಾಲ್ಯ ಮತ್ತು ಮುಪ್ಪು ಎರಡೂ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ವಿಜಯ್, ಎರಡಕ್ಕೂ ಜೀವ ತುಂಬಿದ್ದಾರೆ.
ನಾಯಕಿಯಾಗಿ ‘ನಾತಿಚರಾಮಿ’ಯಲ್ಲಿ ಹಸೀನಾ ಪಾತ್ರ ನಿರ್ವಹಿಸಿದ ಗ್ರೀμÁ್ಮ ಶ್ರೀಧರ್ ಅವರ ಅಭಿನಯ ಕೂಡ ಪಕ್ವವಾಗಿದೆ. ಉದಯ್ ಲೀಲಾ ಛಾಯಾಗ್ರಹಣ ನೋಡುಗರನ್ನು ಒಂದು ಬಾರಿ ಮಲೆನಾಡಿಗೆ ಕರೆದುಕೊಂಡು ಹೋಗುತ್ತದೆ. ಕ್ಯಾಮೆರಾ ಕಣ್ಣಲ್ಲಿ ಮಲೆನಾಡಿನ ಹಸಿರು ಮತ್ತು ಮಳೆಯನ್ನು ಉತ್ತಮವಾಗಿ ಸೆರೆ ಹಿಡಿದಿದ್ದು, ಮಲೆನಾಡಿನ ಸೊಬಗು ಇನ್ನಷ್ಟು ಹೆಚ್ಚಿದೆ.
ಗಗನ್ ಬಡೇರಿಯಾ ಸಂಗೀತಕ್ಕೆ ರಘು ದಿಕ್ಷಿತ್ ಧ್ವನಿ ಗೂಡಿಸಿದ್ದು ಹಾಡುಗಳು ಮೆಲೋಡಿಯಸ್.
ರೋಶನ್ ಜಿ ಅವರ ಪ್ರಾಸ್ತೆಟಿಕ್ ಮೇಕಪ್ ಇಡೀ ಚಿತ್ರದ ಜೀವಾಳವಾಗಿದೆ. ಮೇಕಪ್‍ನಲ್ಲಿ ಸಹಜ ಮುಪ್ಪನ್ನು ಮೂಡಿಸಿ ರೋಶನ್ ಗಮನ ಸೆಳೆದಿದ್ದಾರೆ. ಒಟ್ಟಿನಲ್ಲಿ ಗಂಭೀರತೆ, ಹಾಸ್ಯ, ಪ್ರೀತಿ ಎಲ್ಲವನ್ನೂ ಒಳಗೊಂಡಿರುವ ಯುವಕರಿಂದ ಹಿರೀಕರವರೆಗೂ ಎಲ್ಲರನ್ನೂ ಸೆಳೆಯುವ ಚಿತ್ರ ಇದಾಗಿದೆ.
