ಕೊರೊನಾ ವೈರಸ್ ನಿಯಂತ್ರಣಕ್ಕಾಗಿ ಜಾರಿಗೊಳಿಸಿರುವ ಲಾಕ್‌ಡೌನ್‌ನ ಮೂರನೇ ಹಂತ ಮುಂದುವರೆದಿದ್ದು, ಮೂರನೇ ಹಂತದ ಲಾಕ್‌ಡೌನ್‌ನಲ್ಲಿ ಅಂತರ್‌ ಜಿಲ್ಲಾ ಪ್ರಯಾಣಕ್ಕೆ ಸರಕಾರ ಅನುಮತಿ ನೀಡಿದ್ದು, ಅದಕ್ಕಾಗಿ ಆನ್‌ಲೈನ್‌ನಲ್ಲಿ ಪಾಸ್‌ಗಳನ್ನು ಕೂಡ ವಿತರಿಸುತ್ತಿದೆ. ಹಾಗಾದ್ರೆ ಅಂತರ್‌ ಜಿಲ್ಲಾ ಪ್ರಯಾಣಕ್ಕಾಗಿ ರಾಜ್ಯದಲ್ಲಿ ಇ-ಪಾಸ್ ಪಡೆಯುವುದು ಹೇಗೆ..? ಇಲ್ಲಿದೆ ನೋಡಿ ಡಿಟೇಲ್ಸ್‌.
ಬೆಂಗಳೂರು: ದೇಶದಲ್ಲಿ ಕೊರೊನಾ ವೈರಸ್‌ನ ಅಬ್ಬರ ಮುಂದುವರೆದಿದ್ದು, ಸೋಂಕು ನಿಯಂತ್ರಣಕ್ಕೆ ಜಾರಿಗೊಳಿಸಿದ್ದ ಲಾಕ್‌ಡೌನ್‌ ವಿಸ್ತರಣೆಯಾಗಿದೆ. ಎರಡು ಹಂತದ ಲಾಕ್‌ಡೌನ್‌ಗಳನ್ನು ಬಹಳ ಕಟ್ಟುನಿಟ್ಟಾಗಿ ಜಾರಿಗೆ ತಂದಿದ್ದ ಸರಕಾರ, ಮೂರನೇ ಹಂತದ ಲಾಕ್‌ಡೌನ್‌ನಲ್ಲಿ ಹಲವು ಸಡಿಲಿಕೆಗಳನ್ನು ನೀಡಿದೆ.
ಇದರಲ್ಲಿ ಅಂತರ್‌ ಜಿಲ್ಲಾ ಪ್ರಯಾಣಕ್ಕೆ ಅವಕಾಶ ನೀಡಿರುವುದು ಒಂದು. ಆದರೆ, ಇದಕ್ಕಾಗಿ ಜನ ಸರಕಾರದಿಂದ ಇ- ಪಾಸ್ ಪಡೆಯಬೇಕಾದ ಅಗತ್ಯ ಇದೆ. ಯಾವುದೇ ಮುನ್ಸೂಚನೆ ಇಲ್ಲದೇ ದೇಶವ್ಯಾಪಿ ಲಾಕ್‌ಡೌನ್‌ ಘೋಷಿಸಿದ್ದರಿಂದ ಅನೇಕರು ಕೆಲಸ ಮಾಡುವ ಜಿಲ್ಲೆಗಳಲ್ಲಿಯೇ ಸಿಲುಕಿಕೊಂಡಿದ್ದರೆ, ಹಲವರು ತಮ್ಮ ಊರುಗಳಲ್ಲಿ ಸಿಲುಕಿಕೊಂಡು ಕೆಲಸಕ್ಕೆ ಬರಲಾಗದೇ ಕೆಲಸ ಕಳೆದುಕೊಳ್ಳುವ ಭೀತಿಯಲ್ಲಿದ್ದಾರೆ.
ಇಂತಹವರಿಗಾಗಿ ಸರಕಾರ ಒನ್‌ ಟೈಮ್‌ ಪಾಸ್ ನೀಡುತ್ತಿದ್ದು, ಒಂದು ಬಾರಿಯ ಪ್ರಯಾಣಕ್ಕೆ ಮಾತ್ರ ಅವಕಾಶ ಮಾಡಿಕೊಡಲಾಗುತ್ತದೆ. ಇದಕ್ಕಾಗಿ ಕರ್ನಾಟಕ ಸರಕಾರ ಪ್ರತ್ಯೇಕ ವೆಬ್ಸೈಟ್ https://kspclearpass.idp.mygate.com/ ತೆರೆದಿದ್ದು, ಅಲ್ಲಿ ನೀವು ಇ-ಪಾಸ್‌ನ್ನು ಸುಲಭವಾಗಿ ಪಡೆಯಬಹುದಾಗಿದೆ. ಸುಲಭವಾಗಿ ಪಾಸ್ ಪಡೆಯಲು ಈ ವಿಧಾನಗಳನ್ನು ಅನುಸರಿಸಿ.
ವೆಬ್‌ಸೈಟ್‌ಗೆ ಭೇಟಿ ನೀಡಿ, ಪ್ರಾಥಮಿಕ ವಿವರ ತುಂಬಿ
ಅಂತರ್‌ ಜಿಲ್ಲಾ ಪ್ರಯಾಣಕ್ಕಾಗಿ ಇ-ಪಾಸ್ ಪಡೆಯಲು ರಾಜ್ಯ ಪೊಲೀಸ್‌ ಇಲಾಖೆ ಪ್ರಾರಂಭಿಸಿರುವ https://kspclearpass.idp.mygate.com/ ವೆಬ್‌ಸೈಟ್‌ಗೆ ಭೇಟಿ ನೀಡಿ. ಮೊದಲ ಹಂತವಾಗಿ ನಿಮ್ಮ ಮೊಬೈಲ್‌ ನಂಬರ್‌ ನಮೂದಿಸಿ, ನಿಮ್ಮ ಮೊಬೈಲ್‌ ಸಂಖ್ಯೆಗೆ ಬರುವ ಒಟಿಪಿಯನ್ನು ನಮೂದಿಸಿ. ಒಟಿಪಿ ನಮೂದಿಸಿದ ನಂತರ ಮತ್ತೊಂದು ಪುಟ ತೆರೆದುಕೊಳ್ಳುತ್ತದೆ. ಅಲ್ಲಿ ಪಾಸ್ ಪಡೆಯುವವರ ಪೂರ್ಣ ಮಾಹಿತಿಯನ್ನು ಭರ್ತಿ ಮಾಡಬೇಕು. ಹೆಸರು, ನಿಮ್ಮ ವಿಳಾಸ, ವಾಹನ ಸಂಖ್ಯೆ, ಮೊಬೈಲ್‌ ಮತ್ತಿತರ ಮಾಹಿತಿಯನ್ನು ತುಂಬಿ, ಖಚಿತ ಪಡಿಸಿ ಬಟನ್‌ ಕ್ಲಿಕ್‌ ಮಾಡಿ.
ಸಂಪೂರ್ಣ ವಿವರ ಭರ್ತಿ ಮಾಡಿ
ಖಚಿತ ಪಡಿಸಿ ಬಟನ್‌ ಕ್ಲಿಕ್‌ ಮಾಡಿದ ನಂತರ, ವೆಬ್‌ಸೈಟ್‌ನಲ್ಲಿ ಮತ್ತೊಂದು ಪುಟಕ್ಕೆ ರಿಡೈರೆಕ್ಟ್‌ ಮಾಡಲಾಗುತ್ತದೆ. ಅಲ್ಲಿ ರಿಕ್ವೆಸ್ಟ್‌ ಪಾಸ್ ಎಂಬ ಆಯ್ಕೆಯನ್ನು ಕ್ಲಿಕ್‌ ಮಾಡಬೇಕು. ಅಲ್ಲಿ ನಿಮ್ಮ ಜನ್ಮ ವರ್ಷ, ಗುರುತಿನ ಚೀಟಿ ಸಂಖ್ಯೆ, ಪ್ರಯಾಣದ ಉದ್ದೇಶ, ಭೇಟಿ ಮಾಡುವವರೊಂದಿಗಿನ ಸಂಬಂಧ, ಭೇಟಿಗೆ ಕಾರಣವನ್ನು ಉಲ್ಲೇಖಿಸಬೇಕು. ಹಾಗೂ ನಿಮ್ಮ ಜಿಲ್ಲೆ, ನಿಮ್ಮ ಪೊಲೀಸ್‌ ಠಾಣೆ ಮತ್ತು ನೀವು ತೆರಳುತ್ತಿರುವ ಜಿಲ್ಲೆ ಹಾಗೂ ಆ ಸ್ಥಳದ ವ್ಯಾಪ್ತಿಯ ಪೊಲೀಸ್‌ ಠಾಣೆಯನ್ನು ನಮೂದಿಸಬೇಕು. ಯಾವ ನಗರ, ಹಳ್ಳಿಗೆ ಹೋಗುತ್ತಿದ್ದೀರಿ ಎಂಬುದನ್ನು ಕೂಡ ಉಲ್ಲೇಖಿಸುವ ಅಗತ್ಯವಿದ್ದು, ಭೇಟಿ ನೀಡುವ ವ್ಯಕ್ತಿ, ಅವರ ಮೊಬೈಲ್‌ ಸಂಖ್ಯೆ ಹಾಗೂ ಯಾವ ದಿನಾಂಕದಿಂದ ಯಾವ ದಿನಾಂಕದವರೆಗೆ ಎಂಬುದನ್ನು ನಮೂದಿಸಬೇಕು.
ಗರಿಷ್ಠ ನಾಲ್ವರಿಗೆ ಮಾತ್ರ ಪ್ರಯಾಣಕ್ಕೆ ಅವಕಾಶ
ಎಲ್ಲ ಮಾಹಿತಿಯನ್ನು ನಮೂದಿಸಿದ ನಂತರ ನಿಮ್ಮ ಜೊತೆ ಪ್ರಯಾಣ ಮಾಡುವವರ ವಿವರಗಳನ್ನು ಭರ್ತಿ ಮಾಡಬೇಕಾಗುತ್ತದೆ. ಸರಕಾರ ಚಾಲಕ ಸೇರಿ ಗರಿಷ್ಠ ನಾಲ್ವರಿಗೆ ಮಾತ್ರ ಒಂದು ವಾಹನದಲ್ಲಿ ಪ್ರಯಾಣಕ್ಕೆ ಅವಕಾಶ ನೀಡಿದೆ. ಅದರಲ್ಲಿ ಮೂವರು ವಯಸ್ಕರು ಹಾಗೂ 12 ವರ್ಷದೊಳಗಿನ ಮಗುವಿಗೆ ಅವಕಾಶ ನೀಡಿದೆ. ಇದರ ನಂತರ ನಿಮ್ಮ ಹಾಗೂ ನಿಮ್ಮ ಜೊತೆ ಪ್ರಯಾಣಿಸುವವರ ಗುರುತಿನ ಚೀಟಿಗಳನ್ನು ಅಪ್‌ಲೋಡ್‌ ಮಾಡಬೇಕಾಗುತ್ತದೆ. ಇದಾದ ನಂತರ ಮೇಲೆ ನೀಡಿರುವ ಎಲ್ಲ ಮಾಹಿತಿ ಸರಿಯಾಗಿದ್ದು, ನಾನು ಪ್ರಯಾಣಕ್ಕೆ ಅರ್ಹ ಎಂದು ಬಾಕ್ಸ್‌ನಲ್ಲಿ ಟಿಕ್‌ ಮಾಡಿ ಕನ್ಫರ್ಮ್‌ ಬಟನ್‌ ಕ್ಲಿಕ್‌ ಮಾಡಿ.
ಕೊನೆ ಹಂತ ಇ-ಪಾಸ್ ಪಡೆಯಿರಿ
ಕನ್ಫರ್ಮ್‌ ಬಟನ್‌ ಕ್ಲಿಕ್‌ ಮಾಡಿದ ನಂತರ ನಿಮಗೆ ಪಿಡಿಎಫ್‌ ಆವೃತ್ತಿಯಲ್ಲಿ ಇ-ಪಾಸ್ ಕಾಣಿಸುತ್ತದೆ. ಇ-ಪಾಸ್‌ನ ಕೆಳಗಡೆ ಇರುವ ಪ್ರಿಂಟ್‌ ಪಾಸ್ ಎಂಬ ಆಯ್ಕೆ ಕ್ಲಿಕ್‌ ಮಾಡಿ, ಇ-ಪಾಸ್‌ನ್ನು ಸೇವ್‌ ಮಾಡಿಕೊಳ್ಳಿ. ಈ ರೀತಿ ಸುಲಭವಾಗಿ ಇ-ಪಾಸ್ ಪಡೆಯಬಹುದಾಗಿದ್ದು, ಅಗತ್ಯವಿದ್ದಲ್ಲಿ ಮೊಬೈಲ್‌ನಲ್ಲಿರುವ ಇ-ಪಾಸ್ ತೋರಿಸಿ ನೀವು ಪ್ರಯಾಣಿಸಬಹುದಾಗಿದೆ. ಸರಕಾರ ನೀಡುವ ಪಾಸ್ ಕೇವಲ ಒಂದು ದಿನ ಮತ್ತು ಒಂದು ಬಾರಿಗೆ ಮಾತ್ರ ಬಳಸಬಹುದಾಗಿದೆ.
ಹೊರ ರಾಜ್ಯಕ್ಕೆ ಹೋಗುವವರು ಪಾಸ್ ಪಡೆಯುವುದು ಹೇಗೆ..?
ಬೇರೆ ರಾಜ್ಯದ ಕಾರ್ಮಿಕರು, ವಿದ್ಯಾರ್ಥಿಗಳು, ಪ್ರವಾಸಿಗರು ಇತರೆ ರಾಜ್ಯಗಳಿಗೆ ತೆರಳಲು ಬಯಸಿದರೆ ಕರ್ನಾಟಕ ಸರ್ಕಾರದ ಸೇವಾಸಿಂಧು ಯೋಜನೆಯ https://sevasindhu.karnataka.gov.in/Sevasindhu/English ವೆಬ್ಸೈಟ್ ಮೂಲಕ ತಮ್ಮ ಹೆಸರು, ವಿವರಗಳನ್ನು ನೋಂದಾಯಿಸಿಕೊಳ್ಳಬಹುದು. ಸಂಬಂಧಪಟ್ಟ ಜಿಲ್ಲಾಡಳಿತಗಳು ಆದ್ಯತೆಯ ಮೇರೆಗೆ ವಲಸಿಗರನ್ನು ಅವರ ರಾಜ್ಯಕ್ಕೆ ಕಳುಹಿಸಿಕೊಡಲಿವೆ.
