ಜಿನೀವಾ : ಬ್ರಿಟನ್ನಲ್ಲಿ ಹೆಚ್ಚಿನ ಪ್ರಸರಣ ದರದೊಂದಿಗೆ ಪತ್ತೆಯಾಗಿರುವ ಹೊಸ ರೂಪಾಂತರ ಕರೊನಾ ವೈರಸ್ ಇನ್ನು ಮಿತಿ ಮೀರಿಲ್ಲ ಮತ್ತು ಸದ್ಯ ಅನುಸರಿಸುತ್ತಿರುವ ಕ್ರಮಗಳೊಂದಿಗೆ ವೈರಸ್ ಅನ್ನು ಹಿಡಿತದಲ್ಲಿಟ್ಟುಕೊಳ್ಳಬಹುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್ಒ) ಸೋಮವಾರ ಸ್ಪಷ್ಟನೆ ನೀಡಿದೆ.
ಈ ಸಾಂಕ್ರಾಮಿಕ ರೋಗದ ವಿವಿಧ ಹಂತಗಳಲ್ಲಿ ನಾವು ಹೆಚ್ಚು ಸೋಂಕಿನ ಪ್ರಮಾಣ ಹೊಂದಿದ್ದು, ವೈರಸ್ ಅನ್ನು ನಿಯಂತ್ರಣಕ್ಕೆ ತರಬಹುದಾಗಿದೆ. ಸದ್ಯ ವೈರಸ್ ಕೈಮೀರಿದೆ ಎಂಬ ಪರಿಸ್ಥಿತಿ ಇಲ್ಲ ಎಂದು ಡಬ್ಲ್ಯುಎಚ್ಒ ತುರ್ತು ಪರಿಸ್ಥಿತಿ ಮುಖ್ಯಸ್ಥ ಮೈಕೆಲ್ ರಯಾನ್ ತಿಳಿಸಿದ್ದಾರೆ.
ಇದಕ್ಕೂ ಮುನ್ನ ಮಾತನಾಡಿದ್ದ ಬ್ರಿಟಿಷ್ ಆರೋಗ್ಯ ಕಾರ್ಯದರ್ಶಿ ಮ್ಯಾಟ್ ಹ್ಯಾನ್ಕಾಕ್, ಹೊಸ ರೂಪಾಂತರ ಕರೊನಾ ವೈರಸ್ ನಿಯಂತ್ರಣ ತಪ್ಪಿದ್ದು, ಗರಿಷ್ಠ 70ಕ್ಕಿಂತ ಹೆಚ್ಚು ಪ್ರಸರಣ ದರವನ್ನು ಹೊಂದಿದೆ ಎಂದು ಹೇಳಿದ್ದರು.
ವೈರಸ್ ವಿರುದ್ಧ ಪ್ರಸ್ತುತ ನಾವು ಅನುಸರಿಸುತ್ತಿರುವ ಉಪಕ್ರಮಗಳು ಸರಿಯಾಗಿವೇ ಇವೆ ಎಂದಿರುವ ರಯಾನ್, ಸದ್ಯ ನಾವು ಏನು ಮಾಡುತ್ತಿದ್ದೇವೋ ಅದನ್ನು ಹಾಗೇ ಮತ್ತಷ್ಟು ಗಂಭೀರತೆಯಿಂದ ಅನುಸರಿಬೇಕು. ಹೀಗೆ ಮಾಡುವುದರಿಂದ ವೈರಸ್ ಅನ್ನು ಮತ್ತೆ ನಿಯಂತ್ರಣಕ್ಕೆ ತರಬಹುದೆಂದು ರಯಾನ್ ಹೇಳಿದ್ದಾರೆ.
ವೈರಸ್ ಮತ್ತಷ್ಟು ಹರಡಬಾರದು ಎಂದ ರಕ್ಷಣಾ ದೃಷ್ಟಿಯಿಂದ ಸದ್ಯ ಬ್ರಿಟನ್ ಅಥವಾ ದಕ್ಷಿಣಾ ಆಫ್ರಿಕಾಗೆ ಪ್ರಯಾಣ ಬೆಳೆಸುವುದನ್ನು ಸುಮಾರು 30 ರಾಷ್ಟ್ರಗಳು ರದ್ದು ಮಾಡಿವೆ.
ತುಂಬಾ ಎಚ್ಚರಿಕೆ ವಹಿಸಿದ್ದೇವೆ. ವೈರಸ್ ಹರಡುವಲ್ಲಿ ಸ್ವಲ್ಪ ಹೆಚ್ಚು ಪರಿಣಾಮಕಾರಿಯಾಗಿದ್ದರೂ ಸಹ, ವೈರಸ್ ಅನ್ನು ನಿಲ್ಲಿಸಬಹುದು ಎಂದು ರಯಾನ್ ಅವರು ಭರವಸೆ ನೀಡಿದ್ದಾರೆ.
