ದೇಶದಲ್ಲಿ ಕಾಂಗ್ರೆಸ್ ವಿರುದ್ಧ ಭಾರೀ ಅಪಪ್ರಚಾರ ನಡೆಯುತ್ತಿದೆ. ಕಾಂಗ್ರೆಸ್ 70 ವರುಷದಲ್ಲಿ ಏನು ಮಾಡಿದೆ ಎಂದು ಪ್ರಧಾನಿ ಪ್ರಶ್ನಿಸುತ್ತಾರೆ: ಖರ್ಗೆ ವ್ಯಂಗ್ಯ-ಕಹಳೆ ನ್ಯೂಸ್
ದೇಶದಲ್ಲಿ ಕಾಂಗ್ರೆಸ್ ವಿರುದ್ಧ ಭಾರೀ ಅಪಪ್ರಚಾರ ನಡೆಯುತ್ತಿದೆ. ಕಾಂಗ್ರೆಸ್ 70 ವರುಷದಲ್ಲಿ ಏನು ಮಾಡಿದೆ ಎಂದು ಪ್ರಧಾನಿ ಪ್ರಶ್ನಿಸುತ್ತಿದ್ದಾರೆ. ಒಂದು ವೇಳೆ ಕಾಂಗ್ರೆಸ್ ಏನೂ ಮಾಡಿಲ್ಲವೆಂದರೆ ಮೋದಿಯವರು ಪ್ರಧಾನಿಯಾಗುತ್ತಿರಲಿಲ್ಲ ಎಂದು ರಾಜ್ಯಸಭಾ ವಿಪಕ್ಷ ನಾಯಕ ಮಲ್ಲಿಕಾರ್ಜುನ ಖರ್ಗೆ ಹೇಳಿದ್ದಾರೆ. ಮಂಗಳೂರಿನ ಮಲ್ಲಿಕಟ್ಟೆಯಲ್ಲಿರೋ ಕಾಂಗ್ರೆಸ್ ಕಚೇರಿಯಲ್ಲಿ ನಡೆದ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಅವರು, ಸಂವಿಧಾನ, ಪ್ರಜಾಪ್ರಭುತ್ವವನ್ನ ಕಾಂಗ್ರೆಸ್ ಉಳಿಸಿದೆ. ರಸ್ತೆ, ರೈಲ್ವೇ, ವಿದ್ಯುಚ್ಛಕ್ತಿ, ಬಿ.ಎಸ್.ಎನ್.ಎಲ್ ಇದನ್ನೆಲ್ಲ ಯಾರು ಮಾಡಿದ್ದು..? ನಾವು ಮಾಡಿದ್ರಲ್ಲೇ ನೀವು ಬದುಕು ನಡೆಸುತ್ತಿದ್ದೀರಿ ಎಂದು ವ್ಯಂಗ್ಯವಾಡಿದರು.
ಇನ್ನು ಕಾಂಗ್ರೆಸ್ ಯೋಜನೆಯ ಫಲಾನುಭವಿಗಳೂ ಸುಮ್ಮನಿರುವುದು ದುರ್ದೈವ. 70 ವರುಷದಲ್ಲಿ ವಾಜಪೇಯಿ, ದೇವೇಗೌಡರೂ ಸಹಿತ ಹಲವು ಬಿಜೆಪಿಯೇತರೂ ಇದ್ದರು. ಕಾಂಗ್ರೆಸ್ ಆಳಿದ್ದು 50 ರಿಂದ 60 ವರುಷವಷ್ಟೇ. ಕಾಮ್ ಸೆ ನಾಮ್ ಹೋತಾ ಹೈ ಎಂದರು.
ಇನ್ನು ದೇಶದಲ್ಲಿ ಇಬ್ಬರು ಮಾರುವವರು ಇದ್ದಾರೆ. ಹಾಗೆಯೇ ಇಬ್ಬರು ಅದನ್ನು ಖರೀದಿಸುವವರು ಇದ್ದಾರೆ. ಕಾಂಗ್ರೆಸ್ ಮಾಡಿದ್ದನ್ನೆಲ್ಲ ಆ ಇಬ್ಬರಿಗೆ ಕೊಡುತ್ತಿದ್ದಾರೆ ಎಂದು ಕಿಡಿಕಾರಿದ್ರು.
ಇನ್ನು ರೈಲ್ವೇ ಸಾರ್ವಜನಿಕ ಸೇವೆಯಲ್ಲಿದ್ದರಿಂದ ಕೋವಿಡ್ ಸಮಯದಲ್ಲಿ ಆಕ್ಸಿಜನ್ ಸಾಗಿಸಲು ನೆರವಾಯಿತು. ಅದೇ ರೈಲ್ವೇ ಖಾಸಗೀಕರಣ ಮಾಡಿದ್ರೆ ಇದೆಲ್ಲ ಸಾಧ್ಯವೇ..? ಯುದ್ಧ, ಸಂದಿಗ್ಧ ಸ್ಥಿತಿಯಲ್ಲಿ ಖಾಸಗೀಕರಣ ಮಾಡಿದ್ರೆ ಸಂಕಷ್ಟ ಎದುರಿಸಲಿದ್ದೇವೆ. ಯುಪಿಎ ಸಮಯದಲ್ಲಿ ಟಿಕೆಟ್ ದರ ತುಸು ಏರಿಕೆ ಮಾಡಿದ್ರೂ ಪ್ರತಿಭಟಿಸುತ್ತಿದ್ದರು. ಆದರೆ ಈಗ ರೈಲ್ವೇಯನ್ನೇ ಖಾಸಗಿಯವರಿಗೆ ಮಾರಲು ಮುಂದಾಗಿದ್ದಾರೆ. ಆದರೆ ಜನ ಸುಮ್ಮನಿದ್ದಾರೆ.
ದೇಶದಲ್ಲಿ ವಾಕ್ ಸ್ವಾತಂತ್ರ್ಯವನ್ನ ಕಿತ್ತುಕೊಳ್ಳಲಾಗಿದೆ. ಸತ್ಯ ಹೇಳುವ ಮಾಧ್ಯಮ, ಜನರನ್ನ ಬೆದರಿಸಲಾಗುತ್ತಿದೆ. ಮೋದಿ, ಶಾ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನ ಹತ್ತಿಕ್ಕುತ್ತಿದ್ದಾರೆ.
ಪೆಗಾಸಸ್ ಗೂಢಚರ್ಯೆಯಲ್ಲಿ ತಪ್ಪಿಲ್ಲದಿದ್ದರೆ ಸರಕಾರಕ್ಕೆ ಭಯವೇಕೆ..? ಅಧಿವೇಶನದಲ್ಲಿ ಪೆಗಾಸಸ್ ಬಗ್ಗೆ ಚರ್ಚಿಸಲು ಅವಕಾಶ ಯಾಕಾಗಿ ಕೊಟ್ಟಿಲ್ಲ ಎಂದು ಪ್ರಶ್ನಿಸಿದರು.
ಇನ್ನು ಕಲ್ಬುರ್ಗಿ ಮಹಾನಗರ ಪಾಲಿಕೆಯಲ್ಲಿ ಎಆS ಜೊತೆ ಮೈತ್ರಿ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿದ ಅವರು, ಕಲ್ಬುರ್ಗಿ ಜನರ ಬೆಂಬಲ ಕಾಂಗ್ರೆಸ್ ಗೆ ಇದೆ. 27 ಕಾಂಗ್ರೆಸ್, 23 ಬಿಜೆಪಿ, 4 ಜೆಡಿಎಸ್, 1 ಪಕ್ಷೇತರ ಇದೆ. ಬಿಜೆಪಿ ವಿರೋಧಿ ಸದಸ್ಯರು 32 ರಷ್ಟಿದ್ದಾರೆ. ಹೀಗಾಗಿ ದೇವೇಗೌಡರಿಗೆ ಕರೆ ಮಾಡಿ ಮಾತನಾಡಿದ್ದೇನೆ. ಕಾಂಗ್ರೆಸ್ ಪರ ಜನ ಬೆಂಬಲವಿರುವುದಾಗಿ ತಿಳಿಸಿದ್ದೇನೆ. ಇಲ್ಲಿ ಎಲ್ಲವೂ ವಿಶ್ವಾಸದ ಮೇಲಷ್ಟೇ ನಡೆಯುತ್ತದೆ. ಮೇಯರ್ ಸ್ಥಾನದ ಬಗ್ಗೆ ಸ್ಥಳೀಯ ನಾಯಕರು ತೀರ್ಮಾನಿಸುತ್ತಾರೆ. ಬಕ್ರೀದ್ ಮೇ ಬಚೇಂಗೆ ತೋ, ಮೊಹರಂ ಮೇ ನಾಚೇಂಗೆ” ಎಂದು ಖರ್ಗೆ ವ್ಯಾಖ್ಯಾನಿಸಿದ್ರು.
ಇನ್ನು ಮೇಯರ್ ಸ್ಥಾನ JDS ಗೆ ನೀಡುವ ಕುರಿತ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಖರ್ಗೆ, ಮೊದಲು ಅಧಿಕಾರ ಸಿಗಲಿ. ಆನಂತರ ಮೇಯರ್ ಸ್ಥಾನ ನೀಡುವ ಬಗ್ಗೆ ಯೋಚಿಸಲಿ ಅಂದರು.
