ಬೆಂಗಳೂರು: ಕುಂಬಳಗೋಡಿನ ದೊಡ್ಡಬೆಲೆಯ ಸನ್‍ವರ್ತ್ ಅಪಾರ್ಟ್‍ಮೆಂಟ್‍ನಲ್ಲಿ ಸ್ಯಾಂಡಲ್ ವುಡ್ ನ ಉದಯೋನ್ಮುಖ ನಟಿಯೊಬ್ಬರು ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ.
ಕಿರುತೆರೆ ಹಾಗೂ ಬೆಳ್ಳಿತೆರೆಯಲ್ಲಿ ಮಿಂಚಿದ್ದ ನಟಿ ಸೌಜನ್ಯ ಮೃತಪಟ್ಟವರು. ಆಕೆಯ ಮೃತದೇಹದ ಸಮೀಪ. ಸೂಸೈಡ್ ನೋಟ್ ಕೂಡ ಪತ್ತೆಯಾಗಿದೆ.
ನಟಿ ಸೌಜನ್ಯ ಗೆಳೆಯ ವಿವೇಕ್ ಎಂಬಾತನ ಜೊತೆ ಅಪಾರ್ಟ್‍ಮೆಂಟ್‍ನಲ್ಲಿ ವಾಸವಾಗಿದ್ದಳು. ಅದೇ ಪ್ಲ್ಯಾಟ್ ನಲ್ಲಿ ಆಕೆಯ ಮೃತ ದೇಹವು ಪತ್ತೆಯಾಗಿದೆ. ಕುಂಬಳಗೂಡು ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿದ್ದು ಪರಿಶೀಲನೆ ನಡೆಸುತ್ತಿದ್ದಾರೆ.
ವಿವೇಕ್‍ಗೆ ಬೆಳಿಗ್ಗೆ ತಿಂಡಿ ತರುವಂತೆ ತಿಳಿಸಿ ಕಳುಹಿಸಿದ್ದು ವಾಪಸ್ಸು ಬಂದ ವೇಳೆ ಆಕೆ ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ಸೌಜನ್ಯ ಮೃತ ದೇಹದ ಪಕ್ಕ ಸಿಕ್ಕಿರುವ ಡೆತ್ ನೋಟಿನಲ್ಲಿ ನನ್ನ ಸಾವಿಗೆ ಯಾರೂ ಕಾರಣರಲ್ಲ. ನನ್ನ ಸಾವಿಗೆ ನಾನೇ ಕಾರಣ. ನನ್ನನ್ನು ಕ್ಷಮಿಸಿ ಅಪ್ಪ-ಅಮ್ಮ ಅಂತ ಬರೆಯಲಾಗಿದೆ.
ಇನ್ನು ಈ ಡೆತ್ ನೋಟ್ ಅನ್ನು ಮೂರು ದಿನದ ಹಿಂದೆಯೇ ಬರೆಯಲಾಗಿತ್ತು ಎಂದು ಹೇಳಲಾಗುತ್ತಿದೆ. ತನ್ನ ಮಾನಸಿಕ ಆರೋಗ್ಯ ಅಷ್ಟಾಗಿ ಸರಿಯಿಲ್ಲ ಎಂದು ಬರೆಯಲಾಗಿದ್ದು ಪದೇ ಪದೇ ಪೋಷಕರ ಬಳಿ ಕ್ಷಮೆ ಕೇಳಲಾಗಿದೆ. ಅಮ್ಮನನ್ನು ಚೆನ್ನಾಗಿ ನೋಡಿಕೊಳ್ಳುವಂತೆ ಅಪ್ಪನಲ್ಲಿ ಮನವಿ ಮಾಡಲಾಗಿದೆ.
ಸೌಜನ್ಯ ಅವರು ಮೂಲತಃ ಕೊಡಗು ಜಿಲ್ಲೆಯ ಕುಶಾಲನಗರದ ಮೂಲದವರಾಗಿದ್ದು, ಹಲವಾರು ಧಾರಾವಾಹಿ ಹಾಗೂ ಚೌಕಟ್ಟು, ಫನ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ.
