ರಿಲಯನ್ಸ್ ಸಮೂಹ, ವಿಪ್ರೊ, ಕೋಕೋ ಕೋಲಾ , ಮುಕೇಶ್‌ ಅಂಬಾನಿ ನೀಡಿದ್ದ ಆಫರ್‌ನ್ನು ತಿರಸ್ಕರಿಸಿದ ಪ್ರತ್ತೂರಿನ ‘ಬಿಂದು’ – ಕಹಳೆ ನ್ಯೂಸ್
ಮಂಗಳೂರು: ದಕ್ಷಿಣ ಭಾರತದಾದ್ಯಂತ ಹೆಸರುವಾಸಿಯಾಗಿರುವ ‘ಬಿಂದು’ ಬ್ರ್ಯಾಂಡ್‌ ಖ್ಯಾತಿಯ ಮೇಘ ಫ್ರುಟ್‌ ಪ್ರೊಸೆಸಿಂಗ್ ಪೈವೇಟ್ ಲಿಮಿಟೆಡ್ ಸಂಸ್ಥೆಯನ್ನು ಮಾರಾಟ ಮಾಡುವ ಉದ್ದೇಶ ಇಲ್ಲ ಎಂದು ಮಾತೃ ಸಂಸ್ಥೆ ಎಸ್.ಜಿ. ಕಾರ್ಪೊರೇಟ್ಸ್‌ನ ಆಡಳಿತ ನಿರ್ದೇಶಕ ಸತ್ಯಶಂಕರ್ ಸ್ಪಷ್ಟಪಡಿಸಿದ್ದಾರೆ. ‘ಕ್ಯಾಂಪಾ ಕೋಲಾ’ ಖರೀದಿ ಬಳಿಕ ರಿಲಯನ್ಸ್ ಬಿಂದು ಸೇರಿದಂತೆ ಹಲವು ಬ್ರ್ಯಾಂಡ್‌ಗಳನ್ನು ಖರೀದಿಸಲು ಮುಂದಾಗಿದೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ ಅವರು ಈ ಪ್ರತಿಕ್ರಿಯೆ ನೀಡಿದ್ದಾರೆ.
ಕುಗ್ರಾಮದಲ್ಲಿ ಬೆರಳೆಣಿಕೆಯಷ್ಟು ಕಾರ್ಮಿಕರಿಂದ ಆರಂಭಗೊಂಡ ಸಂಸ್ಥೆ ಇಂದು 500 ಕೋಟಿ ರೂ. ವ್ಯವಹಾರ ಮಾಡುತ್ತಿದೆ. 2025ರ ವೇಳೆಗೆ 1,000 ಕೋಟಿ ರೂ. ವ್ಯವಹಾರದ ಗುರಿ ಹಾಕಿಕೊಂಡಿದ್ದು, ಸದ್ಯಕ್ಕೆ ದೇಶದ ಶೇ. 60ರಷ್ಟು ಭೌಗೋಳಿಕಾ ಪ್ರದೇಶದಲ್ಲಿ ಕಂಪನಿ ಮಾರುಕಟ್ಟೆಯನ್ನು ಹೊಂದಿದೆ.
ದಕ್ಷಿಣದ ಕನ್ನಡದ ಪ್ರತ್ತೂರು ಮತ್ತು ಆಂಧ್ರ ಪ್ರದೇಶದಲ್ಲಿ ಉತ್ಪಾದನಾ ಘಟಕ ಹೊಂದಿರುವ ಕಂಪನಿಯ ಬಿಂದು ಮಿನರಲ್‌ ವಾಟರ್, ಬಿಂದು ಫಿಜ್‌ ಜೀರಾ ಮಸಾಲ ಸೇರಿದಂತೆ 50ಕ್ಕೂ ಅಧಿಕ ಆಹಾರ ಹಾಗೂ ಪಾನೀಯ ಉತ್ಪನ್ನಗಳು ಹೆಚ್ಚಿನ ಬೇಡಿಕೆಯನ್ನು ಹೊಂದಿವೆ. ಅದರಲ್ಲೂ 2002ರಿಂದ ಆರಂಭವಾದ ಬಿಂದು ಫಿಜ್‌ ಜೀರಾ ಮಸಾಲ ಭಾರೀ ಜನಪ್ರಿಯತೆ ಗಳಿಸಿದೆ.
“ರಿಲಯನ್ಸ್ ಸಮೂಹ ಸೇರಿದಂತೆ ವಿಪ್ರೊ, ಕೋಕೋ ಕೋಲಾ ಸೇರಿದಂತೆ ಹಲವಾರು ಬಹುರಾಷ್ಟ್ರೀಯ ಕಂಪನಿಗಳು ಖರೀದಿಗೆ ಆಸಕ್ತಿ ತೋರಿಸಿದ್ದವು. ಉದ್ಯಮ ಕ್ಷೇತ್ರದಲ್ಲಿ ಖರೀದಿಗೆ ಆಸಕ್ತಿ ತೋರಿಸುವುದು ಸಾಮಾನ್ಯ ಪ್ರಕ್ರಿಯೆ. ಆದರೆ ನಮಗೆ ಕಂಪನಿಯನ್ನು ಮಾರಾಟ ಮಾಡುವ ಉದ್ದೇಶ ಇಲ್ಲ. ಮುಂದಿನ ದಿನಗಳಲ್ಲಿ ಕಂಪನಿಯನ್ನು ಇನ್ನಷ್ಟು ಬೆಳೆಸುವ ಗುರಿ ಹಾಕಿಕೊಂಡಿದ್ದೇವೆ,” ಎಂದು ತಿಳಿಸಿದ್ದಾರೆ.
ಅಮೆರಿಕ, ಗಲ್ಫ್ ರಾಷ್ಟ್ರ ಸೇರಿದಂತೆ ವಿದೇಶಿ ಮಾರುಕಟ್ಟೆಯನ್ನೂ ಹೊಂದಿರುವ ಕಂಪನಿ ಇದೀಗ.ಉತ್ತರ ಭಾರತ ಹಾಗೂ ಮಧ್ಯ ಭಾರತಕ್ಕೆ ಮಾರುಕಟ್ಟೆ ವಿಸ್ತರಿಸುವ ಉದ್ದೇಶದಿಂದ ಹೈದರಾಬಾದ್‌ನಲ್ಲಿ ಬೃಹತ್ ಘಟಕವನ್ನು ಆರಂಭಿಸಿದೆ.
“ದಕ್ಷಿಣ ಭಾರತದ ಅತಿ ದೊಡ್ಡ ಪಾನೀಯ ಘಟಕ ಎಂಬ ಗೌರವಕ್ಕೆ ಎಸ್.ಜಿ ಗ್ರೂಪ್ ಪಾತ್ರವಾಗಿದೆ. ಈ ಹಿನ್ನೆಲೆಯಲ್ಲಿ ಸಂಸ್ಥೆಯನ್ನು ಮಾರಾಟ ಮಾಡಲಾಗುತ್ತಿದೆ ಎಂಬ ಸುದ್ದಿ ಹರಡಿಸಲಾಗಿದೆ,” ಎಂದು ಕಂಪನಿ ಹೇಳಿದೆ. ಕಂಪನಿಯು ಬಿಂದು ಪ್ಯಾಕೇಜ್ಡ್‌ ಡ್ರಿಂಕಿಂಗ್ ವಾಟರ್, ಬಿಂದು ಫಿಚ್‌ ಜೀರಾ ಮಸಾಲಾ , ಬಿಂದು ಲೆಮೆನ್, ಸಿಪ್‌ಆನ್‌ ಬ್ರ್ಯಾಂಡ್‌ನಲ್ಲಿ ಮ್ಯಾಂಗೊ, ಮ್ಯಾಂಗೋ ಮಿಲ್ಕ್‌ಶೇಕ್‌, ಲೆಮನ್ ವಿದ್ ಮಿಂಟ್, ಆ್ಯಪಲ್, ಪೇರಳೆ, ಲಿಚ್ಚಿ, ದಾಳಿಂಬೆ, ಪುನರ್ಪುಳಿ, ಸ್ಟ್ರಾಬರಿ, ಪ್ರೋಜನ್ ಬ್ರ್ಯಾಂಡ್‌ನಲ್ಲಿ ಆ್ಯಪಲ್, ಆರೆಂಜ್‌, ಶುಂಠಿ, ಸ್ಟ್ರಾಬರಿ ಝಿವೋ ಬ್ರ್ಯಾಂಡ್‌ನಲ್ಲಿ ಸೋಡಾ, ಕೋಲಾ ಹಾಗೂ ಸ್ನ್ಯಾಕ್‌ ಅಪ್‌ನಲ್ಲಿ 15 ತರಹದ ತಿಂಡಿಗಳನ್ನು ಉತ್ಪಾದಿಸಿ ಮಾರಾಟ ಮಾಡುತ್ತಿದೆ.
ಕಂಪನಿಯು ವಿಸ್ತರಣಾ ಯೋಜನೆಯಡಿ 200 ಕೋಟಿ ರೂ. ಬಂಡವಾಳವನ್ನು ವಿಶಾಖಪಟ್ಟಣಂನಲ್ಲಿ ಹೂಡಲಿದ್ದು, ಇದಕ್ಕೆ ಆಂಧ್ರ ಪ್ರದೇಶ ಮುಖ್ಯಮಂತ್ರಿ ಇತ್ತೀಚೆಗೆ ಚಾಲನೆ ನೀಡಿದರು. ವಿಶೇಷ ವಿತ್ತ ವಲಯದಲ್ಲಿ ಬಿಂದು ಪಾನೀಯದ ಘಟಕಕ್ಕೆ 12 ಎಕರೆ ಭೂಮಿಯನ್ನು ಆಂಧ್ರ ಪ್ರದೇಶ ಸರಕಾರ ನೀಡಿದೆ.
“ಸಂಸ್ಥೆಯನ್ನು ಇನ್ಯಾವುದೇ ಕಂಪನಿಗೆ ಮಾರಾಟ ಮಾಡುವ ಉದ್ದೇಶ ಇಲ್ಲ. ಇನ್ನಷ್ಟು ಬೆಳೆಸುವ ಗುರಿಯನ್ನು ಹಾಕಿಕೊಂಡಿದ್ದೇವೆ,” ಎಂದು ಸಂಸ್ಥೆ ಸ್ಪಷ್ಟಪಡಿಸಿದೆ. ಈ ಮೂಲಕ ಮುಕೇಶ್‌ ಅಂಬಾನಿ ನೀಡಿದ್ದ ಆಫರ್‌ನ್ನು ಕಂಪನಿ ತಿರಸ್ಕರಿಸಿದೆ.
