ಬೆಳ್ತಂಗಡಿ ತಾಲೂಕಿನ ಉಜಿರೆಯಲ್ಲಿರುವ ರಾಷ್ಟ್ರೀಯ ಮಾನ್ಯತೆ ಪಡೆದ( NABH) ಬೆನಕ ಹೆಲ್ತ್ ಸೆಂಟರಿನಲ್ಲಿ ಅಂತಾರಾಷ್ಟ್ರೀಯ ದಾದಿಯರ ದಿನಾಚರಣೆಯ ಪ್ರಯುಕ್ತ ದಿನಾಂಕ. 12.05.2023 ರಂದು ತಾಲೂಕಿನ ಹಿರಿಯ ದಾದಿಯಾದ ಶ್ರೀಮತಿ ದೇವಮ್ಮ ಅವರನ್ನು ಗೌರವಿಸುವ ಮೂಲಕ ವಿಶಿಷ್ಟವಾಗಿ ದಾದಿಯರ ದಿನಾಚರಣೆ ಆಚರಿಸಲಾಯಿತು. ಆಸ್ಪತ್ರೆಯ ವೈದ್ಯಕೀಯ ನಿರ್ದೇಶಕರಾದ ಡಾIIಗೋಪಾಲಕೃಷ್ಣ ಮತ್ತು ಡಾII ಭಾರತಿ ದಂಪತಿಗಳು ಶ್ರೀಮತಿ ದೇವಮ್ಮರವರಿಗೆ ಶಾಲು ಹೊದಿಸಿ ಫಲಪುಷ್ಪಗಳನ್ನು ಅರ್ಪಿಸಿ ನೆನಪಿನ ಕಾಣಿಕೆ ನೀಡಿದರು. ಇದೇ ಸಂದರ್ಭದಲ್ಲಿ ಆಸ್ಪತ್ರೆಯ ಎಲ್ಲ ದಾದಿಯರಿಗೆ ದೀಪವನ್ನು ನೀಡಿ ದಾದಿಯರ ದಿನಾಚರಣೆಗೆ ಕಾರಣ ಕರ್ತರಾದ ನೈಟಿಂಗೇಲ್ ಅವರ ಸ್ಮರಣಾರ್ಥ ಸಹಾಯಕ ನರ್ಸಿಂಗ್ ಸುಪರಿಂಟೆಂಡೆಂಟ್ ಸಿಸ್ಟೆರ್ ಶ್ವೇತಾ ಎನ್.ವಿ ಯವರು ಪ್ರತಿಜ್ಞಾ ವಿಧಿ ಬೋಧಿಸಿದರು. ಶ್ರೀಮತಿ ದೇವಮ್ಮನವರು ಮಾತನಾಡಿ ದಾದಿಯರ ಕೆಲಸ ಅತ್ಯಂತ ಪವಿತ್ರವಾದದ್ದು ಅದು ದೇವರ ಪೂಜೆಗೆ ಸಮಾನ. ಆಸ್ಪತ್ರೆಯ ಎಲ್ಲ ದಾದಿಯರೂ ಇದನ್ನು ನೆನಪಿನಲ್ಲಿಟ್ಟುಕೊಂಡು ಪ್ರೀತಿಯಿಂದ ನಿಮ್ಮ ಕರ್ತವ್ಯ ನಿರ್ವಹಿಸಿ ಎಂದು ಆಶೀರ್ವದಿಸಿದರು. ಡಾII ಗೋಪಾಲಕೃಷ್ಣರವರು ಮಾತನಾಡಿ ಈ ಹಿಂದೆ ಕರ್ತವ್ಯ ನಿರ್ವಹಿಸಿದ ಮತ್ತು ಈಗ ಕೆಲಸ ನಿರ್ವಹಿಸುತ್ತಿರುವ ದಾದಿಯರು ಮತ್ತು ಸಿಬ್ಬಂದಿಗಳಿಂದಾಗಿ ಆಸ್ಪತ್ರೆ ತಾಲೂಕಿನಲ್ಲಿಯೇ ಗುರುತಿಸಲ್ಪಡಲಾಗಿದೆ ಮುಂದೆಯೂ ಇದೇ ರೀತಿ ಸಹಕಾರ, ಕರ್ತವ್ಯ ನಿರ್ವಹಿಸಿ ಇನ್ನಷ್ಟು ಬೆಳೆಯುವಂತಾಗಲಿ ಎಂದು ಎಲ್ಲ ದಾದಿಯರಿಗೂ ಶುಭಾಶಯ ಕೋರಿದರು. ನರ್ಸ್ ಕೆ.ಎನ್ ಸ್ವಾತಿ ಇವರು ದಾದಿಯರ ದಿನಾಚರಣೆಯ ಪ್ರಾರಂಭ ಮತ್ತು ಮಹತ್ವದ ಕುರಿತು ಮಾಹಿತಿ ನೀಡಿದರು. ಸಾರ್ವಜನಿಕ ಸಂಪರ್ಕಾಧಿಕಾರಿ ಶ್ರೀ ಎಸ್.ಜಿ ಭಟ್ ಇವರು ಸ್ವಾಗತಿಸಿ ನಿರೂಪಣೆಗೈದರು. ಇದೇ ಸಂದರ್ಭದಲ್ಲಿ ಸಿಬ್ಬಂದಿಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮ ಏರ್ಪಡಿಸಲಾಗಿತ್ತು.
